Aiako Harria Parke Naturaleko ibilbide labur eta eder honek oso interesgarria bilakatzen duten hainbat elementu ditu; izan ere, paisaia liluragarrien ikuspegi bikainekin batera kultura ondarearen hainbat adibide ezagutzeko aukera eskaintzen baitu. Horien artean daude Ozentzioko ermita zaharra eta Elorrietako kaskoko mairu-baratzea. Elorrietako mairu-baratzea edo cromlech-a, muinoaren gainean dago (398m). Arreta berezia merezi dute garai ezberdinetako isla direlako.

Hildakoen errautsak jasotzeko hilobiak ziren mairu-baratzeak, k.a. lehen milurtekoan bizi ziren artzainenak izango dira.

Oiartzungo Karrika auzotik gora dagoen Sorondoko baserri ondotik abiatu gara. Berehala bide-seinale zuriak eta berdeek ikusiko ditugu eta horiek jarraitu behar ditugu gora egiten duen pista zabalean barrena. Erraz iritsiko gara Elorrietako kaskoan dagoen izen bereko mairu-baratzearen ondora. Talaia paregabea da Oarsoaldeko herriak eta Jaizkibel mendilerroa ikusteko.

Maldan behera abiatuta basoaren barrena egingo dugu ibilbidearen hurrengo tartea. Basotik ateratzerakoan berriro zabalduko zaigu ikuspegia. Asfaltatutako bide bat hartzera eramango gaituzte seinaleek, eta horrela iritsiko gara Ozentzioko ermitaren ondora.

Herri arkitekturan oinarritutako eraikuntza da. Bigarren karlistadan eraiki zuten orduko parrokiara joaterik ez eta jendeak elizkizunetara kalerik ez egiteko. Hargin lan interesgarria du.

Ermita eta baserria atzean utzi eta bueltan laster itzuliko gara abiapuntura, Sorondora.

Distantzia: 4,6 km.

Iraupena: ordu bat eta 25 minuto.

Zailtasuna: txikia.

Desnibela: +/- m.

Argazkien iturria: Aiako Harria Parke Naturala