Bizkaiko hainbat klubek plataforma bat sortu dute beste klub batzuen jardunbidea salatzeko.
 42 taldek osatzen dute Bizkaiko Eskola Futbolaren Babeserako Plataforma. Tartean dira Zaldibarko Zaldua, Iurretako Gertasport eta Amorebieta.

Egoera orokor bat salatu gura dute. “Klub batzuek zoratu egiten dituzte umeak eta gurasoak euren eskaintzekin, umeak oraindino horixe direnean: ume. Zertarako? Inguruko hamar umerik onenak talde berean batzeko. Egiten dutena umeak heztea da? Nire ustez, hori garaipena edo emaitzak beste edozeren gainetik jartzea da”, salatu du Gertasporteko presidente Mikel Arangurenek. Zalduako koordinatzaile Karmelo Alonsoren ustez ere “9 urteko umeak onen eta txarren artean sailkatzen hasten bagara, okerreko bidetik goaz; adin  horretan, dibertitzea da helburu behinena”.

Galdera zera da: umeen artean zein punturaino lehenetsi behar da lehia jolasaren aurretik? “Umeek euren inguruan egon behar dutela uste dugu, eta futbolean gozatu egin behar dutela beste ezeren gainetik”, azaldu du Amorebietako klubeko eskola futboleko arduradun Argoitz Argotek.

Euren ateak ume denei irekita daudela diote, hobeak zein txarragoak izan. Beste klub batzuek, ostera, aukeraketa bat egiten dutela diote. “Taldetik ez dutela umerik botatzen diote. Baina ume batzuek ez dute urte osoan jokatzen, gurasoak haserretu egiten dira eta urte amaieran badoaz. Ez dituzte botatzen, baina, zelanbait esanda, joatera gonbidatzen dituzte”, dio Arangurenek.

Erantzukizunak

Gurasoen erantzukizuna handia dela diote Bizkaiko Eskola Futbolaren Babeserako Plataformako kideek. “Erantzukizunaren %100, erru osoa eurena da”, Arangurenen ustez. “Maradona berriaren ‘Mara’ badutela-eta, ‘Dona’ horren bila doaz”. Buruagaz baietz diote bere solaskide biek. “Klubek eskaintza erakargarri bat egin dezakete, baina azken erabakia gurasoena da”, erantsi du Argotek. Ume batek futbolerako talentua badu, gora helduko dela uste dute, talde batean zein bestean egon. Azken batean, diotenez, “ez da normala ume bat hamar urtegaz hiru klubetan egon izana”.

Bada Bizkaiko Foru Aldundiak erantzukizunik baduela uste duenik ere. “Eurak dira mailak jartzen aurrenekoak liga desberdinak eratuta, eta, kakotx artean esanda, lehiara behartzen gaituzte”, dio Abadiño K.E.-ko talde federatuen arduradun Unai Sagarnak.

Zenbait lekutan gaia gaiztotuta dago eta merezi du iritzi guztiak kontuan hartzeak. Erreportaje osatua egin dute anboto.eus atarian.

Informazioaren eta argazkiaren iturria: Anboto.eus