Abenduaren erdialdean hasi ziren Soraluzeko Estaziñoko parke zaharra desmuntatzen, berriari lekua egiteko. Hilabeteko eraikitze eta muntatze lanak egiten ibili ondoren otsail hasieran inauguratuko dute. Berezia da Estaziñoko parkea. Alde batetik dituen elementu ez-ohikoengatik eta bestetik parkea berritzeko burutu duten prozesu parte-hartzailearengatik.
Andoni Iñurritegirekin elkarrizketa.


“Elementu naturalek —enborrak, harriak, harea, belarra…— eta egurrean egindako egiturek garrantzia berezia dute, haurren irudimenari bide ematen dion jolas-eredu berria sustatzeko helburuarekin”, azpimarratu dute Soraluzeko Udaletik.

Parte-hartze prozesuari dagokionean ia urtebeteko lanaren emaitza da Estaziñoko parke berria. Jolasan estaziñua izenarekin parte-hartze prozesua abiarazi zuten Soraluzen, eta haurren eta gurasoen iritziak eta ekarpenak bideratzeko hamalau lan saio egin dituzte. Baita ere, parke eredu ezberdinen eta parkeek haurren heziketan duten garrantziaren gaineko hausnarketa.

Hain zuzen ere, otsailaren 2an egindako inaugurazioan prozesu horretan parte hartutako haurrak, nerabeak eta gurasoak izan ziren protagonista.

Udaleko Haurren eta Gazteen Batzordetik modu positiboan baloratu dute landutako prozesua eta eskerrak eman nahi dute bertan parte hartu duten pertsona guztiek egindako ekarpenengatik. Batzordeko arduradun Patricia Borinagak esandako moduan “parke eredu ezberdina eman du emaitza moduan prozesuak, orain artean zeudenetatik oso bestelakoa”.

 

Parkea zelan eraiki duten ikusteko aukera ere izan dute Soraluzeko haurrek eta gurasoek; izan ere, parkearen elementu asko, egurra bertara ekarri eta bertan eraiki dituzte, parkearen berezitasuna handituz. Estaziñoko parkea Azpeitiako Kimu Bat enpresak eraiki du 42.618,62 euroko aurrekontuarekin.

Zirkuitu itxurako parkea

Zirkuitu itxura du Estaziñoko parkeak. Aintzat hartzen du ingurumenarekiko errespetua eta zirkuituaren bueltan bueltan ditu umeentzako jolasak. Erdiguneko esparruan daude jarlekuak.

Txirrista handia, gora eta behera ibiltzeko eskailerak, tuneltxoak, tipi itxurako gordelekuak, hondar-gunea… ditu parkeak. Tirolina ipintzea ezinezkoa izan da eta estalkia ere aurrekontutik kanpo gelditu da azkenean.

Hezkuntza proiektuko dinamizatzaile Andoni Iñurritegik azpimarratu du irudimena lantzen lagunduko duen parke mota dela, eta erabilera anitzekoa.

Informazio gehiago plaentxi.eus atarian.