Non hasten da? Haurdunaldi aurrerako zenbait gako.

Gurasotasuna non hasten den galdetu zidan orain gutxi lagun batek, eta nik galdera itzuli nionean, espero nuen erantzuna jaso nuen: “haurdunaldian”. Beste zenbaitek haurra jaiotzen denean hasten dela erantzungo dute, eta ni ez nago ados ez batarekin ez bestearekin.

Nire ustez, eta zenbait autore esanguratsuk dioten bezala, gurasotasuna haurdunaldia baina lehen hasten da maiz, behintzat, haurdunaldia bilatzea kontzienteki egiten den kasuetan.

Haurdunaldi aurrea sarri kontuan hartzen ez den garaia izaten da eta berebiziko garrantzia izan dezake. Batetik, haurdunaldi aurrean gaudenean, gure gorputza, emozioak, pentsamendua haurrari enfokatzeko garai oso interesgarria izan daitekelako, baina baita ere, fisikoki garrantzia handia daukan garaia izan daitekelako.

    Zer egin beharko litzake haurdunaldi aurrean?

Arlo desberdinetako profesional gero eta gehiago ari dira haurdunaldi aurreko “prestakuntzaren” garrantzia azpimarratzen. Batetik, haurdunaldi aurreko osasun azterketa egitea gomendatzen dute,  odol analisia eta zenbaitetan zitologia ere gomendatzen da. Oinarrizko osasun azterketa honen bidez, amagaia nola dagoen ikusiko da eta tratamendurik behar duen gabeziarik topatuko balitz, hauek konpondu. Bestetik, azido folikoa ere hartzen hastea gomendatzen da, gutxienez, haurdunaldia bilatu baina 3 hilabete lehenago, eta familia medikuak, emaginak edo ginekologoak gomendatuko du.

Alkohola, tabakoa eta bestelako drogak uzten laguntzeko gakoak ere eskainiko zaizkio amagaiari eta mediku tratamendurik hartzen badu egokia den edo aldatu behar den aztertuko da.

Elikadura osasuntsurako gakoak ere emango zaizkio eta horrek gorputza prestatzen lagunduko du.

Bestetik, pelbi zoruan espezializaturiko fisioterapeutek, prestakuntza fisikoaren garrantzia azpimarratzen dute maiz, inpaktu kirolik egiten bada edo aurretik pelbi zorua ahulduta egon badaiteke, indartzeko.

Azkenik, odontologoek ere haurdunaldi aurrean beharrezko tratamenduak egitea gomendatzen dute, eta amagaiak D bitamina maila egokiak dituela ziurtatzea, haurraren hortzak egokiro garatu daitezen eta amaren ahoko gaixotasunek haurdunaldian edo erditzean eragin ez dezaten (gaixotasun periodontala sortzen duten bakteriak gai dira plazentaren muga gainditzeko eta erditze goiztiarrarekin edo pisu baxuko haurrak izatearekin harremana duela erakutsi duten ikerketak daude gaur egun).

    Amagaiak bakarrik?

Bikotean harturiko erabakia bada, zentzuzkoa eta egokia dirudi, bikoteko bi kideek aldaketak egitea: tabakoa, alkohola eta drogek eragina izan dezakete espermatozoideen mugikortasunean (bikotekidea gizonezkoa bada), dieta biek aldaturik errazagoa izango da…

Haurdunaldirako prozesua lagundua izango bada (inseminazio artifiziala, in vitroa…) edo adopzio kasuetan ere, aldaketa horiek biek egiteak “familia egituratzea” erraztuko dute.

    Emozionalki nola prestatu?

Haurdunaldi aurrea une oso egokia izan daiteke komunikazioa lantzeko, komunikazio ez bortitza aplikatzen ikasteko eta gure emozioei arreta eskaintzeko. Sentitzen duguna adieraziz, prozesua bera nola bizitzen ari garen hobeto ulertuko dugu eta bikoteak diren kasuetan, bikote bezala harremana indartzen lagunduko digu.

Gainera, haurra jaiotzen denerako eredu egokiak izango gara adimen emozionalean.

Informazioa jasotzeko une oso egokia izaten da, ilusioz, zalantzaz, beldurrez… bizi daiteken garaia izanik, informazioak lasaitasuna emango digu: zenbat denbora behar da haurdun geratzeko bataz beste? Noiz joan behar dut ginekologoarengana haurdun geratzea lortzen ez badut? Noiz ematen da obulazioa? Noiz komeni da harremanak izatea? … ziurrenik aurrez planteatu ez ditugun galderak izango dira, eta horien erantzunak bilatzeak, ateak zabalduko dizkigu haurdunaldiaren proiektu horri oinarri sendoak ezartzeko.

    Bidean pausoak emateko unea…

Haurdunaldi aurrea kontzienteki bizi badugu, prozesuaren une garrantzitsu bezala, gurasotasuna den bide zoragarrian urratsak ematen ariko gara, guraso sentitzen hasiko gara, eta bidea luzea edo motz izan, proiektu hori, errealitate bihurtzen arituko gara.

    Eta zuen gurasotasuna noiz hasi zen?