Testuinguru batean kokatzen garenean askotan ingurua neurtzeko joera daukagu. Lagunik onena zein den argi eta garbi edukitzea eta adieraztea, lan batean onena zein den markatzea, ikasle onena zein den etengabe seinalatzea… Aipatutako bereizkeria jarraituak gatazkak, bazterketak eta biolentziak eragin ditzake eta komeni da bizi dugun horri arreta jartzea, izan ere denok bihurtu gaitezke eragile edo jasotzaile. Egoera batean guk arazorik ez edukitzeak, ez du esan nahi arazorik ez dagoenik edo arazoen sortzaile ez garenik eta, hau oso presente eduki beharko genuke. Ez dugu formula magikorik ezagutzen baina egoera horiek gainditzeko ezagutzen dugun elementu bakarra zentzumen guztiekin bizitzaren bizitzea da, orainari arreta jarriaz eta testuinguruak besarkatzea.

Gaietan teorizatzea baino gaiak bizitzea eta horiekin adierazpenak sortzea dugu maite. Hala egin genuen urriak 27an Oiartzunen ospatutako Haziak egunean. Bizi eta adierazi lemapena komunitatean elkar ezagutuz eta adieraziz parte hartzeko egun erabat zabal eta irekia izan zen.
Bertan, sentimenduak adierazteko mota ezberdinak daudela eta denak direla baliagarriak azaleratu nahian, herriko txoko ezberdinak adierazpen mota anitzez saretu genituen. Horrela, esan ipuinekin, esan irudiekin, esan gorputzarekin eta esan marrazki bizidunekin eremuetan murgiltzeko parada izan genuen bertaratu ginen guztiok.

Gorputz guztiak dira ezberdinak, bakoitzak mugimendu mota bat du baina elkarrekin gauza ugari egin ditzakegu, zen esan gorputzekin txokoaren aldarria.

Esan ipuinekin txokoan ipuinak, istorioak, ahotsa, gorputz lengoaia eta irudimena nahastu ziren.
Hitzei eta sentimenduei forma eta kolorea eman zitzaien aldiz esan irudiekin txokoan.
Oiartzungo Arditurri meategietan gertatzen den herriko alegia bat oinarritzat hartu genuen esan marrazki bizidunekin txokoan eta gerturatutakoek alegia honi bizitza eman genion. Alegian, pikatxoia eta pala lan tresnak dira protagonista nagusiak eta hauen bidez, norbanakoaren garrantzia eta balioa, guztion beharra, elkarlana, aniztasuna… bezalako baloreak adierazten dira. Kutxa magikoetan bizia eta magia sortzen hasi aurretik, eta alegia entzun ondoren, haur eta heldu, heldu eta haur, elkarrekin erabakiak hartzen izan ginen: pertsonaiak definitu, eszenak zatitu, audioa grabatzeko pertsonak hautatu, ardurak banatu… Komunitate giroan, elkarlanean aritu ginen kutxa magikoen bidez magia sortzen eta herrikoa ahozko istorio zaharrei bizia eta kolorea ematen.
Baina goiko azalpen laua baino, nahiago dugu emaitza ikustea… Hemen duzue Pikatxoia eta pala bideo-ipuina.

“Pikatxoia eta pala” (Haziak Eguna, Oiartzun, 2018/10/27) from Haziak on Vimeo.

Ekintzaren fitxa orokorra:
“Pikatxoia eta pala”: Marrazki bizidunak, bideo-ipuina.
Pikatxoia eta pala alegia: Behin batean… alegia (Xabier susperregi, Oiartzungo Udala, 2008) ISBN: 978-84-88917-24-9
Parte hartzaileak: Bertaratutako haur, gazte eta helduak. Haziak, Oiartzungo Abaraxka ludoteka eta Oiartzungo udala
CC by-Sa