Urtarrilari amaiera emateko sormen jokoak egin zituzten Arrasateko gaztetxean bertako Guraso eta Haur Asanbladak antolatuta. Bertaratutako umeak zein gurasoak birziklatutako edo berrerabilitako materialarekin ibili dira batez ere eraikuntza jokoetan parte hartzen.

Harrera beroa izan zuen ekimenak. Adinaren arabera, ume txikiagoek eta handiagoek aukera izan zuten askotariko sormen jokoekin jolas egiteko. Ume txikienak, esaterako, kartoizko arrautza kaxekin edota komuneko paperaren bilkariekin jolasean ibili ziren. Nagusiagoek, aldiz, makedo eraikuntza jokoan ibiltzeko aukera izan zaten; izan ere, kartoi ugari zeukaten bertan, eta adibidez, tunel itxurako eraikuntza bat egiten ibili ziren.

Gaztetxearen filosofiarekin bat

Asanbladako kide den Itsaso Galarraga gurasoak esan du jende dezente bertaratu zenez, pozik gelditu direla, eta gaineratu du gaztetxearen filosofiarekin bat egiten dutela halako ekimenek: “Autonomoak izaten erakusten digute halako ekimenek, guk egindako gauza gutxirekin, ondo pasa daitekeela erakusten digute”.