Eusko Jaurlaritzak hainbat argibide eman ditu doakotasun neurri berria dela-eta erabiltzaileen artean nagusitu diren galderei erantzuna emateko. Galdera horien artean dira: Noiz arte iraungo du? Nola eta non aplikatzen da? Zer gertatzen da txartelen saldoarekin?

Zergatik erabaki da garraio publikoaren doakotasuna 12 urtera arte zabal dadin bultzatzea?

Eusko Jaurlaritzako Mugikortasun Jasangarriaren Sailak neurria bultzatu nahi izan du ingurumena gehien errespetatzen duten garraiobideak bultzatzeko, belaunaldi berriengan garraio publikoa erabiltzearen ohitura zabaltzeko eta, aldi berean, familia-ekonomiak arintzeko.

Aldi baterako neurria al da?

Hamabi urte bete arteko doakotasuna egiturazko neurria da. Hau da, geratzeko iritsi da, EAEn jada ezarrita zegoen 0-6 urte bitarteko doakotasuna bezalaxe.

Zer garraiobidetan aplikatzen da?

EAEko eta lurralde historikoetako garraio publikoko operadore guztiek doakotasuna aplikatzen dute 12 urte bete arte, lurralde-organoetan hala erabakia ondoren, eta udalerrietako operadore gehienek ere bai.

Zer behar da?

6 eta 12 urte bitarteko haur guztiek txartel pertsonalizatua eduki beharko dute doakotasuna lortzeko.

12 urteko haurrek ordaindu behar al dute?

Bai, doakotasuna 12 urte betetzen dituzten aurreko egunera arte aplikatzen da. Adin horretara heltzen diren egunean hasiko dira dagokien tarifa ordaintzen.  

Eta 6 urtetik beherakoek?

Garraio kolektiboa orain arte bezala erabiltzen jarrai dezakete, txartel pertsonalizatua eskatu beharrik gabe.

Non lor daiteke txartela?

Hemen kontsulta daitezke txartel berria eskatzeko prozedurak eta bete beharreko eskakizunak: Bat (Araba), Barik (Bizkaia) eta Mugi (Gipuzkoa).

Hiru txartelak bizilekuaz bestelako herrialde batean erabil al daitezke?

Bai, 12 urtetik beherakoek beren Bat, Barik eta Mugi pertsonalizatuak erabil ditzakete Euskal Autonomia Erkidegoko hiru lurraldeetako garraio publikoetan, inolako kosturik gabe.

Zer gertatzen da txarteletan aurrez dagoen saldoarekin?

6-12 urte bitarteko adingabe baten txartelean kontsumitu gabeko saldoa badago, saldoa txartelean mantenduko da pertsonak 12 urte bete eta ordaintzen hasi arte.

Eta arazoren bat badago eta EAEko garraio publikoko balioztatzaileren batean bidaia kobratzen bada?

Garraio publiko bakoitzeko Bidaiarien Arretarako Bulegoetan eska daiteke zenbatekoa itzultzea.

12 urtetik beherako haur batek bakarrik bidaiatu al dezake Euskotrenen?

Bakarrik bidaiatu dezake, baina gurasoen edo tutoreen baimena izan behar du. Baimena hemen deskarga daiteke.

Iturria: irekia.