14 urtetik beherakoak irten ahalko dira, baina helduek baimenduta dituzten jardueretan laguntzeko

Ministroen Kontseiluak adingabeen konfinamendua arintzea onartu du, baina bakarrik alarma-egoerako dekretuak baimentzen dituen jarduerak egiteko eta heldua zeregin horretan dagoen bitartean. Ez besterik.

Neurri berria astelehenean, apirilaren 27an, sartuko da indarrean eta zantzu guztien arabera, azkenean, 0-14 urte bitarteko neska-mutikoei eragingo die nahiz eta hasiera batean 12 urteko muga aipatu zuten. Maria Jesus Montero ministroak adierazi du heldu batek lagunduta “supermerkatuetara, farmaziara edo banketxera joateko” aukera izango dutela adingabeek. “Adibide batzuk eman ditut, baina ideia da neska-mutikoak atera ahal izatea dekretuak baimentzen dituen jarduerak egitera doan heldu batekin”.

Irteera horiek zenbat denborakoak izan daitezkeen galdetuta ministroak esan du ez duela inork kronometroarekin neurtuko. Zentzuz jokatu behar dela esan du, eta gaineratu du gida bat egingo dutela jarduera horiek zeintzuk izan daitezkeen azaltzeko.

Etxeko heldu batekin

Adingabeak etxekoa duen heldu batekin egin beharko du irteera, eta 15 eta 18 urte bitarteko gazteei dagokienez, “bakarrik joaten dira erosketak egitera, eta egiten jarrai dezakete”, esan du Monterok.

Erabakia adituen gomendioei jarraituz hartu dutela esan du ministroak, eta arriskuak eta onurak aztertu ostean: “Haur gehienak, salbuespenak salbuespen, beren etxeetan egon dira bost aste hauetan, eta eboluzio-fasea kontuan hartuta, kutsatzeko aukera oso txikia da”.

Askotariko erreakzioak

Erabakiaren berri eman bezain laster ugaritu dira askotariko erreakzioak. Lotsagarritzat jo dute askok eta ez dela aukerarik seguruena azaldu dute beste batzuk.

“Hau ez da itxialdiaren aringarri bat, eta ez ditu haurren eskubideak kontuan hartzen. Espazio itxiek ugaritu egiten dute birusaren transmisioa. Paseoak aire zabalean –inguruko herrialdeetan baimenduta dago– ez ditu kutsatzeak areagotzen, eta ongizate iturri dira”, adierazi du Pedagogia berdea izenarekin indarra hartu duen heziketa proposamenaren bultzatzaile Heike Freire pedagogoak.

Argazkiaren iturria hemen.