Adituek argi dute: konfinamenduak badu eragina gu guztion lo ohituretan. Ez bakarrik loezinean. Amesgaiztoak eta amets arraroak ugaritzen ari dira, eta zenbait kasutan haurrek zailtasunak dituzte lo hartzeko. Ez dute bakarrik lo egin nahi, gauean gehiago esnatzen dira… Zer ari da gertatzen?

Gonzalo Pin doktorea mediku pediatra da, eta espezialista lo kontuetan. Konfinamendu egoera hasi zenetik gaiaren inguruko hainbat gako eman ditu askotariko komunikabideetan.

“Gurasoek jakin behar dute normala dela. Erantzun fisiologiko guztiz osasungarria eta normala da haurrengan –helduengan bezala–. Ohera joaten gara egunez egin dugunaren motxilarekin, eta gure bizimodua erabat aldatu da. Haurrek beraien gizarte-erreferente ia guztiak galdu dituzte: ez dira eskolara joaten, ez dira parkean lagunekin jolasten, ez daude patioan… Seinale berriak jasotzen ari dira, eta horrek eragina du barne-erlojuan. Desoreka bat gertatzen ari da, eta horregatik daude desorientatuta”, azaltzen du Pin doktoreak.

Ondo lo egiteko haur batek hiru gauza behar dituela azaltzen du doktoreak: segurtasuna, afektibitatea eta konfiantza mundua kontrolpean dagoela. “Bizi dugun egoera honetan konfiantza eta segurtasuna bereziki nahaspilatuta daude. Orduan, normala da nire semeak okerrago lo egitea? Jakina. Normala da nire alabak ohera joateko beldur handiagoa izatea? Jakina. Transmititzen ari garena, konturatu gabe bada ere, segurtasunik eza da”.

Konfiantza eta errutinak

Adituak argi dauka haurrek segurtasun eta konfiantza handiagoa behar dituztela. Gurasoen esku ere badago hori, neurri batean. “Haurrei informazio asko ematen badiegu, eta egun guztian kezkatuta bagaude, kezka transmititzen diegu, eta segurtasun falta sentitzen dute. Hala, amesgaiztoak, lo arina eta etengabeko esnatzeak handitu egiten dira”.

Beti erraza ez bada ere, oso garrantzitsua da errutina batzuk ezartzea. Ez bakarrik zer egin, baizik eta noiz egin. Paseoak, jarduera fisikoa, eskolako lanak… komeni da, ahal dela, goizean egitea. Oso komenigarria da, baita ere, otorduak egiteko ordutegiak mantentzea, eta afariak ohera joan baino pare bat ordu lehenago egitea.

“Eta haur txikiagoetan bikaina izaten da istorioak kontatzea. Ez ipuinak irakurtzea, baizik eta istorioak kontatzea. Milioika urtean gizateriak egin duen ahozko kulturaren transmisioa da haurra desaktibatzeko eta loa errazteko mekanismo onenetako bat”.