Hizkuntza erraldoien erdian bizi da gurea, eta erraldoien artean, esparru anitzetan, txikitasunetik lekua egiten gabiltza aspaldian. Sareek eskaintzen digute honetarako aukera; Sare digitalak eta adituen sareak bat egiten dute guraso.eus egitasmoan eta Arrasatetik osatu dugun elkarlanak (Arrasateko Udala, Goiena Komunikazio taldea eta Txatxilipurdi elkartea) hauspotuta, gurasotasuna eta hazkuntza bezalako gai garrantzitsuen inguruan euskaraz hausnartu dugu 2025. urtean ere.

Hemen duzu urtekaria irakurri edo inprimitzeko formatuan.


Esku artean edo pantaila aurrean duzuna, 2025. urtean guraso.eus egitasmoko kolaboratzaileek idatzitako artikuluak batzen dituen dokumentua da. Kolaboratzaile bakoitzak bere esparrutik idatziak; batzuk esperientzia pertsonalak oinarri hartuta, besteek ogibideak eskainitako eskarmentutik eta beste batzuk eraldatzeko griñetik. Askatasun osoa utzi diegu aurtengoan ere, eta antzemango duzuenez gai askotarikoak oso estilo ezberdinetako artikuluetan argitaratu ditugu.