Proiektu pilotua 2022an hasiko da, eta bi urtez luzatuko da. Berdintasun, Justizia eta Gizarte Politiketako sailburu Beatriz Artolazabalek azaldu du Barnahus zentro baten sexu-abusuaren biktima izandako haurrei eta nerabeei arreta integrala ematen zaiela. Esku hartzen duten sail guztiak koordinatu eta elkarrekin lan egiten dute bertan. “Barnahus polizia-etxeetatik eta ospitaleetatik urrun dagoen gune bat da, eta haurrentzako ingurune atsegina dauka: bere adinera egokitutako dekorazioa eta haurren biktimologian espezializatutako profesionalak ditu”, nabarmendu du sailburuak.

Sexu-indarkeriaren biktima izan diren adingabeek pairatu behar izaten duten beste egoera bat da behin eta berriro eman behar izaten dutela lekukotza, sufrimendua areagotuz. “Hiru urte baino gehiago luza daitekeen ziurgabetasun eta ondoez prozesu bat bizi izaten dute, eta, denbora horretan, gutxienez zortzi pertsonarekin hitz egin behar izaten dute. Barnahusen, biktimak pertsona gutxiagorekin partekatu beharko du bere istorioa, eta berehala izango du laguntza espezializatua”.

Datuak kezkagarriak dira. Artolazabalek azaldu duenez bost adingabetik batek sexu-indarkeria jasan ahal izan du Euskadin. “Gaur, Euskadin, 18 urteko 2.000 eta 4.000 gazte artean egon daitezke bizitza osoan sexu-indarkeriaren bat jasan dutenak”.

Ildo horretatik, hiru lurraldeetako foru-zerbitzuen datuen arabera, 2018an 90 jakinarazpen inguru erregistratu ziren; euskal epaitegietan, berriz, 151 pertsona heldu kondenatu zituzten 16 urtetik beherakoen aurkako sexu-delituengatik. Urte horretan bertan, Ertzaintzak eta udaltzainek 16 urtetik beherakoen aurkako 276 sexu-delitu erregistratu zituzten.

Barnahus proiektuak Save the Children erakundeko kideen laguntza teknikoa izango du.

Save the Children erakundearen txostena

Save the Children erakundeak txosten bat landu du; Euskal Autonomia Erkidegoan sexu-indarkeriaren biktima diren haur eta nerabeen arreta; hobetzeko beharrak eta Barnahus ereduaren ekarpenak.

“Sexu-indarkeria da haurtzaroko indarkeria-modu okerrenetako bat. Gaur egun, 600 sarrera-puntu baino gehiago daude haurren sexu-indarkeria kasu posibleei aurre egiteko. Gainera, haurrak lau zerbitzu desberdinetatik igaro behar du, eta zerbitzu horiek ez daude koordinatuta haientzat ezezagunak diren espazioetan, suspertzea zailtzen dute eta bigarren mailako biktimizazioa eragiten dute”, azaldu du Save the Children Euskadiko zuzendari Charo Arranzek. “Horrek, errekuperazioa oztopatzeaz gain, kaltegarria da prozesu judizialerako, ez baita haren testigantza zaintzen eta adingabeari kalte gehigarria eragiten baitio, bigarren mailako biktimizazioa sortuz. Emaitza: haurren sexu-abusuaren ondorioz irekitako 10 kasutik 7 ez dira epaiketara iristen froga faltagatik”.

Bragy Gudbrandsson da Barnahusen sortzailea. Barnahus hitzak Haurtzaroaren Etxea esan nahi du islandieraz, eta haurrentzako arreta integralaren eredu nordikoa da. Katalunian, Estatu Batuetan eta Europan jada aplikatzen den eredu horrek bikoiztu egin du epaiketa eta kondenen kopurua. “Adin txikikoentzako giro atsegina sortzean, beren ahotsa benetan garrantzitsua dela adierazten duen mezua transmititzen ari gara; hori da, hain zuzen ere, Barnahaus ereduaren muina, haurrari entzutea. Bat dator Haurraren Eskubideei buruzko Konbentzioarekin, bere oinarrizko eskubideetako bat bere iritzia adieraztea baita”, esan du Gudbrandssonek.

Irudiaren iturria https://www.savethechildren.es/modelo-barnahus