Ikastetxeak digitalizazio prozesuan murgilduta dabiltza, baina Suedian aldaketa gertatu da. Suediak irakurketako PIRLS txostenean bederatzigarren postua du, eta herrialdeko ikastetxeetako digitalizazioan balazta jarri du. Hilabeteak daramatzate eztabaidatzen ordenagailu eta pantailen papera eskoletan. Horren ondorioz, Suediako Hezkuntza ministroak jakinarazi du bertan behera utziko duela ikasgelak digitalizatzeko prozesua.

Suediako Gobernuak 150 milioi euro bideratuko ditu liburuetara. 60 ikerketa txosten eskatu dituzte eta denak ondorio berera iritsi direla adierazi dute: “Haurren garunaren ikerketa guztiak erakusten du ez dutela onurarik pantailetan oinarritutako irakaskuntzak”.

Beherakada irakurmenean

Suediako ministroak irakurtzen dutena ulertzeko gaitasuna galtzearen errua pantailei bota die. Europako bataz bestekoa gainditu arren –bataz bestekoa 528 puntukoa da eta Suedian 544 puntu dauzkate; 2016an, aldiz, 555–.

Eskolen digitalizazioa inongo kritikotasunik gabe egin dela eta edukiari erreparatu gabe zuzenean positibotzat jo dela esan izan du Hezkuntza ministroak. Hain justu, eskoletan aurrera eramaten ari diren digitalizazioa eztabaidaren erdira eramateko eta digitalizazio prozesu horren inpaktuak neurtzeko eskatu berri dute Frantziako Estatuan: “Gailu digitala bilakatu dugu ikasketaren elementu pribilegiatu edo bakarra, eta horrela ikasleak bultzatzen ditugu denerako eta edozertarako gailu horiek erabiltzera; ez ditugu haurrak erabiltzaile informatu bihurtzen, algoritmoen menpe dauden kontsumitzaile gatibu baizik”.

Ikusita Europako zenbait herrialdetako egoera zein den. Zer egin beharko litzateke Euskal Herrian?