Astra Txiki, umeentzako eta gurasoentzako espazio irekia Gernikan

Udaberrian bi urte egingo ditu Gernikako Astra Txiki proiektuak. Hamar urteko ibilbidea duen Astra proiektuaren baitan sortua, 90. hamarkadara arte arma fabrika izandako 2.600 metro koadro espazio batean dago kokatuta.

Astra barruko beste hainbat proiekturekin batera elkarbanatzen dute espazioa Astra Txikiko gurasoek eta neska-mutikoek. “Ikusten genuen beharrezkoa zela umeen inguruko begirada bat Astran, eta Astra Txiki sortu genuen guraso talde batek”, azaltzen du talde eragileko Andreak.

Astra zabalik dagoen espazio bat da. Lehenengo solairuan besteak beste eszentokia, barra eta sukaldeak daude. Hor kokatzen da umeendako egokitutako espazioa, eta zabalik egoten da arratsaldeetan umeen eta gurasoen erabilerarako. Espazio multifuntzional moduan aurkeztu du Andreak. “Astean zehar umeen espazioa dena musika areto bihurtzen da kontzertuak egonez gero”, azaltzen du. “Bizikidetza bat egoten da eta hori ere polita da umeek ikusten dutelako funtzionamendua zein den eta harreman batzuk sortzen direlako”.

Autogestioa da Astra proiektuaren kudeaketa eredua eta saiatzen dira umeen artean ere sustatzen. “Astrara etortzen diren umeak 0-6 urte bitartekoak dira eta txikiak izanda ere saiatu izan gara dinamizatutako ekintzen bitartez euren iritziak jasotzen (…) Askotan egin dugu berba gure artean eta uste dugu giroa bera ere aberasgarria dela umeendako: beste era bateko ekintzak ikusten dituzte, harremana dute jende askorekin, ikusten dute gure jarduera guztiak direla guk geuk antolatuak, ikusten dute espazio irekia dela, inguruan ditugun elkarteekin elkarlanean dihardugula… Giro berezia da eta umeek ere jasotzen dute hori”.

Ekintzak

Txikigauak egiten dituzte Astran, auzolanak ere bai umeek erabiltzen duten espazioa zaintzen, garbitzen eta baloratzen ikasteko… Saiatzen dira, baita ere, herri mailan antolatzen diren jaialdietan euren ekintzekin parte hartzen, Astra Eguna egin zuten adibidez  abenduaren 26an.

Astra Txikik ere parte hartzen du jaialdi horretan. “Uste dugu ikusten dutena eta bizitzen dutena ikasten dutela txikiek”, dio Andreak.

Ikuspegi ezberdinak batera

Astra espazioan askotariko gurasoak elkartzen dira, ikuspegi ezberdinak beraz. “Gaude guraso asko aurretik ibilita gaudenak herri mugimenduetan edo esperientzia daukagunak autogestionatutako proiektuetan, baina badaude baita ere lehen aldiz dabiltzanak horrelako espazio batean. Uste dut horrek ere asko aberasten dituela gure batzarrak ze azkenean askoz ere anitzagoak dira gure eztabaidak eta planteamenduak. Astra, beti esan dugu, ikasteko leku bat da eta denon artean ari gara ikasten”.

Hezkuntzaren gaineko hitzaldiak ere egin izan dituzte . “Kanpotik ekarritako jende ezberdinarekin egin ditugu hainbat hitzaldi gero gure artean eztabaidatzeko, gure burua formatzeko…”

Astra proiektuaren inguruko informazioa eta argazkien iturria: hemen.

Astra Txikik presentzia du sare sozialetan. Facebook-en esaterako.