Matiz elkarteko bitartekaria da Lur Kabiketa eta askotariko saioak gidatzen ditu, tartean gatazken kudeaketa egokirako hainbat. Argi du gatazkak hobeto kudeatzen hasteko garrantzitsua dela horien aurrean zer nolako jarrera estiloa dugun ondo antzematea.

“Gatazkak naturalak dira, saihestu ezinak. Baina zerbait negatibo moduan ikusten ditugu, eta lortu beharko genuke aukera moduan ikustea”, dio Kabiketak. “Garrantzitsua da gatazka egoeratan zer nolako jokaera estiloa dugun identifikatzea; izan ere, seguruenik, etxean ikusitakoa erreproduzitzen dugu. Eta jakin behar dugu seme-alabek ere modu horiek erreproduzitzen ikasiko dutela”.

Hainbat gatazka egoera sortzen dira bizitzan, eta askotarikoak. “Pertsona batzuk lehiara jotzen dute; irabazi egin nahi dute nola edo hala. Beste batzuk amore emateko joera handiagoa dute. Bada, baita ere, gatazkak saihestu egiten dituztenak, eta azkenik badaude gatazka sortzen denean zer nahi dute modu lasaian azaltzeko gauza direnak. Azken hori litzateke egokiena”.

Entzute aktiboa

Ingurukoekin –eta bereziki seme-alabekin– gatazka dugunean zein estrategia erabili behar den azaltzerakoan adituak azpimarratzen du komunikazioan dagoela gakoa, eta horretan oso lagungarria dela heziketa emozionala. Emozioak identifikatzen eta adierazten jakitea, alegia. Hala, seme-alabei ere nola sentitzen garen azaltzeko ohitura hartzeko gomendatzen du.

Umea zerbait azaltzen ari zaigunean, berriz, oso lagungarria da entzute aktiboa. “Laburbildu esan digun hori ikus dezan benetan entzun dugula esan duena. Zelan ikusten dugun adieraztea ere oso lagungarria da. Esaterako: “Urduri ikusten zaitut” edo “Gaur ez daukazu atzoko irribarrea”, esatea…

Kabiketaren esanetan, zeregin horretan ezinbestekoa da emozioak lantzea. “Emozioak identifikatzen ikasi egiten da, eta emozio bakoitzak zein jokaera eragiten didan ulertzen ere ikasi egiten da. Gehienetan, haserreak edo amorruak agresibitatera eramaten gaitu. Batzuk oihuka hasten dira besteen gainetik jartzeko helburu horrekin, baina beste batzuek nahiago izaten dute gatazka ezkutatu edo alboratu. Nola edo hala kontua baretzea, alegia. Baina, noski, horrelakoetan ez dugu gatazka konpontzen eta berriz gertatzen da irabazi/galdu eskema, gainera. Bilatu behar duguna da irabazi/irabazi formulara iristea”.

Irtenbide negoziatuak, entzute aktiboa eta emozioen kudeaketa aipatzen ditu Kabiketak.

Eredu egokien bila

Helduok eredu egoki ote garen galdetuta, herren gabiltzala erantzun du adituak. “Gertatzen dena da ez digula inork erakutsi, eta orain arte nork bere moduak aurkitu behar izan dituela etxean, telebistan edo inguruan. Horregatik, normalean, ez dugu ondo egiten. Zalantzarik gabe, ikasi beharra daukagu”.