Irun, Hondarribia eta Hendaia hartzen ditu Txingudi badiak. Bidasoa ibaiak bere bokalean sortutako estuarioa eta badia dira. Hamalau kilometroko ibilbide batek lotzen ditu Hendaiako Abadia jauregia eta Hondarribiko Higer lurmuturra.

Gaurkoan proposatzera gatozena Hendaia eta Irun lotzen dituen bidegorria da.

Eroso egiteko moduko ibilbidea da, tartean itsas bazterretik igarotzen den egurrezko pasarela dagoelarik. Interpretazio seinaleak daude eta askotariko txokoak ezagutzeko aukera ematen du.

Hendaiako hondartzan ematen badiogu hasiera ibilbideari Txingudi Badia izeneko pasealekutik abiatuko gara. Laster iritsiko gara Belzenia izeneko parkera eta bertan jolas parke bat, bizikletentzako pista bat, komunak, iturria eta eserlekuak aurkituko ditugu. Hegaztiak behatzeko begiratoki bat ere badago bertan.

Antzinako Hendaiaren harresien paretik igarotzen da bidea jarraian. Hondarribira begira dauden kanoi zaharrak ikusiko ditugu bertan, eta aurrera egiten badugu Hondarribiko aireportuko pista ikusiko dugu parez pare tartean Bidasoa ibaia dagoelarik. Zorte pixka batekin hegazkin baten lur hartzea edo abiatzea ikus dezakegu ia bertatik bertara.

Bidasoa ibaia zehartzeko eraiki diren zubien azpitik pasatzen da ibilbidea gero. Ibai kontran doan egurrezko pasabidetik egingo dugu tarte hori. Egurrezko pasarela amaitutakoan bidegorri batek hartzen du erreleboa. Pauso edo Behobia auzoraino eramango gaitu eta bertan gurutzatuko dugu Bidasoa ibaia Irunen sartzeko. Zubia gurutzatu bezain pronto jarraitzen du bidegorriak. Faisaien uharte paretik igaroko gara eskumara atseden hartzeko jolas parke bat dagoelarik.

Bidegorriak Santiago zubiraino jarraitzen du. Bertan skate pista handia bat eta jolas parke bat daude, eserlekuekin eta iturriarekin.

Itzultzeko atzera egingo dugu berriz edo Santiago zubitik gertu dagoen Sokoa enpresa parean bidegorria hartzeko dagoen sarrera topatu beharko dugu. Kontuz; izan ere, bigarren aukera egiten badugu tarte bat errepidetik egin beharko dugu.