– Presta zaitezte, alde egin behar dugu-eta!
– Nora, aita?
– Ez dakit, baina hemendik urrutiko norabait.
– Zergatik?
– Jadanik gerra piztu delako

Nola landu haurrekin errefuxiatuen gaia? Nola  azaldu albistegietako irudiak? Hausnarketarako aitzakia polita izan daitezke liburu ilustratua. Gaurkoan Pamiela eta kalandraka argitaletxeek argitaratutako Bidaia Luzea  aurkeztu nahi dizuegu.

 

Aldi berean gertatzen diren bi bidaiaren istorioa dugu Bidaia Luzea. Gertakizunak tartekatzen dira sentikortasun eta samurtasunez beteriko lan honetan; antzar amak eta bere txitek hegoaldeko lur epeletarantz egiten dute hegan. Bitartean, gerran dagoen herrialdetik hanka egin nahian, giza familia batek ihesari ekiten dio iparralderantz.

Bi gertakarien narrazioak bat datoz: ibilaldia eta hegaldia galarazten dituzten erauntsiak, beste batzuekiko topaketak, janari eskasia, predatzaileak eta mafiak, nekeak dakarren adore falta…

Bestalde, helduek txikiengan piztu nahi duten konfiantza eta itxaropena. Eta azkenik erronkarik handiena: itsasoa zeharkatu, zer eta norabide desberdinekin bi ibilaldiak gurutzatzen direneko gunea.

Daniel Hernandez Chambers eta Federico Delicado dira egileak eta esan bezala  bidaia luzeak  hausnartzera bultzatzen gaitu,  begirada  samur eta aldi berean krudelarekin. Ilustrazioak ederrak dira eta ondo laguntzen dute historioan barneratzen.