Bergarako Blai Blai proiektuan buru belarri ibilitakoa da Maite Arantzabal. Irakaslea da lanbidez eta esperientzia batzuk izan ditu haurrekin egindako parte hartze prozesuetan. Hitza modan jarri dela uste du.

“Hitza modan jarri da. Saltzeko balio du eta funtzionatzen duen edo ez ez dakit. Parte hartze lehenengo da dena delako egitasmoan dauden pertsona guztiak mahai berean daudela kontuan hartzea, eta denen hitza kontuan hartzea. Horren bueltan talde lan aktiboa egitea”, azaldu du.

Bergarako Blai Blai prozesuan Kilometroak jaia aitzakia hartuta sortutako egitasmoa izan zen. Jolas parke bat egiteko prozesu parte hartzaile bat izan zen eta neska-mutikoek hartu zuten parte. “Garrantzitsua izan zen egitasmo hori beraiena moduan ikustea, eta pozgarria izan zen entzutea gero “gure parkera goaz”. Tamalez egun bakarreko parkea izan zen, baina pena merezi izan zuen”.

Helduon ikuspegitik umeek esaten edo eskatzen dutena benetan aintzat hartzen dugun galdetuta erantzuten du askotan entzuten dela nola galdetzen den umeei: “Zer nahi duzu?”, baina gero helduok gure filtroa pasatzen dugula sarri. “Galdetzen dugu, entzuten dugu eta oso ondo gelditzen da baina gero emaitza ematen dugunean gure filtrotik edo gure erosotasunetik pasatakoa da. Azkenean gizartean bizi garen moduak ere horretara bultzatzen gaitu. Hor daude zailtasunak eta hor dago erronka”.

Arantzabalen ustez tamainagatik bakarrik txikiago ikusten ditugu neska-mutikoak. “Edo zailtasun gehiagorekin edo konfiantza gutxiagorekin… Eta askotan ez dugu ikusten haurren benetako potentziala. Itsututa gaude”.

Hezkuntzan ere antzerako zerbait gertatzen dela uste du. Saiakera badagoela, baina mugak ere hor daudela; denbora, baliabideak, askotariko oztopoak… “Hor ari gara formatzen eta beste esperientzia batzuk entzuten, baina lan handia dugu aurretik”.

Herritar parte hartzaileak helburua

Arantzabalek zalantzan jartzen du gizartea prest ote dagoen herritar benetan parte hartzaileak izateko. “Gaur egungo haurrak izango dira etorkizuneko helduak, baina uste dut sistemari komeni zaiola ignorantzian edo mugikorrean itsatsita bizi diren gazte edukitzea. Horrek ez dizu pegarik jarriko, ez du zaratarik aterako eta ez da zure kontra etorriko. Sistema horrela eroso dago. Pertsona aktiboak ez dira bat batean sortzen 16 urte betetzen dituztenean. Txikitatik erein behar da hazia, eta hor etxeko eredua garrantzitsua da, eskola ezinbestekoa da eta kalea eta sistema ere bai”.

Entzun Maiterekin izandako elkarrizketa.