Osasun Saila hasita dago haurdun dauden emakumeei kukurruku-eztularen aurkako txertoa jartzen

Astelehenetik aurrera, haurdunaldiaren azken hiruhilekoan dauden emakumeak osasun-zentrora joan ahal izango dira kukurruku-eztularen aurkako txertoa jartzera. Osasun Sailak aurten sartu du gomendio hori txertaketa-egutegian Euskadiko Txertaketen Batzorde Aholkulariak proposatuta.

Emakumeek haurdunaldiaren 27. eta 36. aste artean kukurruku-eztularen aurkako txertoa jarriz Euskadiko jaioberriak “gaixotasun horren aurrean modu eraginkorragoan babestea da helburua. Uneotan egoera epidemiologiko zehatz bat baitago txertaketako estaldura-maila handia duten herrialdeetan, Euskadin esaterako, kukurruku-eztula ugaritzearen ondorioz”, diote Osasun Sailetik ohar bidez.

Emandako datuen arabera 2011tik kukurruku-eztularen agerpena handitu egin da, eta 2012an 100.000 biztanleko 16 kasura iritsi ziren. Gaixo gehien duen adin-taldea urtebetetik beherakoena da. Egoera epidemiologikoa kontuan hartuz, eta Estatuko gainerako erkidegoetan bertsua dela, Osasun Sailak haurdun dauden emakumeei kukurruku-eztularen aurkako txertoa gomendatzea erabaki du, eta haurdunaldian segurtasunez jar daitekeen txertoa dela nabarmendu du.

Kukurruku-eztularen agerpena. Euskadi. 1990-2012

Haurdunaldian, 30. astetik aurrera, fetuari antigorputz babesgarriak plazentaren bidez transmititzen zaizkionez, hirugarren hiruhilekoan kukurruku-eztularen aurka txertatzeak antigorputz babesgarrien kontzentrazio handiagoa igarotzea bermatzen du jaiotzatik unerik hurbilenean, eta horrek are babes handiagoa bermatzen du.

Haurren txertaketa-egutegiak adierazten duen moduan, kukurruku-eztularen aurkako txertoa umea jaio eta 2 hilabetera, 4 hilabetera, 6 hilabetera eta 18 hilabetera jartzen da, estaldura 6 urte dituztenean azken dosi bat emanez osatuta.

Haurdun dauden emakumeei txertoa jarriz are babes handiagoa ematen zaie umeei gaixotasun honen aurka.