Lapurdiko hiriburua eta Ipar Euskal Herriko hiri nagusia da Baiona eta oso egokia da bizikletan ibiltzeko. Bada turismo bulegotik abiatzen den 5,4 kilometroko ibilbide bat txirrindularientzako propio egindakoa. Ibilbide zirkularra da, seinaleztatuta dago eta ia ez du desnibelik.

Ibilbidean seinaleztatuta daude bai norabide aldaketak bai igarobide bereziak, eta oinezkoentzako zein bizikletentzako diren guneetan oinezkoen abiaduran joateko eskatzen dute.

Bideak Baionako auzo historikoak zein monumentu garrantzitsuenak ezagutzeko aukera eskaintzen du: Baiona ttipia, Baiona handia, lorategi botanikoa, gaztelu zaharra, katedrala, euskal museoa, Baionako kaia… ikusiko ditugu. Baiona Aturri eta Errobi ibaien konfluentzia izanik bi ibaiak gurutzatzen ditu ibilbidean.

Esan bezala, turismo bulegoan (Placa des Basques) du hasiera eta amaiera.

Argibideetarako: Baionako turismo bulegoa edo infos@bayonne-tourisme.com