Nahia Alkorta: “Doulen kontrako erasoa ez ezik, emakumeen erabakitzeko gaitasunaren kontrako erasoa da ‘Informe Doula’ delakoa”

Sabeletik mundura proiektuan aritzeaz gain edoskitze eta haurra soinean eramateko aholkulari moduan jarduten du Alkortak. Doula formazioa ere badauka. “Astakeri larritzat” jotzen du Informe Doula delakoa.

Alkortarentzako benetako sorgin ehiza da Espainiar estatuan doulen aurka abiatu dutena. “Pena merezi du 25 orriko txostena irakurtzeak. Facebook eta hainbat webguneetako irudiak jasotzen ditu, eta gezurrez beteta dago”, dio Alkortak. “Txostenak dio, esaterako, doulak sekta kanibal bat direla. Azkenean, ez da soilik doulen aurkako erasoa; emakumeen erabakitzeko gaitasunaren aurkako erasoa ere bada”, ohartarazten du.

Txostenean arrazoi eta justifikazio falta sumatu ditu Alkortak. “Ebidentzia zientifikoaren aurkakoak diren adierazpenak egiten dira txosten horretan”, esan du. “Esaterako, indarkeria obstetrizikoa doulen asmakizuna dela Munduko Osasun Erakundeak horren inguruko adierazpena duela hilabete atera duenean”. Gehiago dio Alkortak: “Badaude ikerketak jasotzen dutenak doula batek parte hartzen duen erditzea, bataz beste, bi ordu motzagoa dela, oxitocina behar izatearen tasa %40  jaisten dela, eta zesareak erdira jaisten direla”.

Alkorta txundituta dago txostenak izan duen oihartzunarekin. Gaia komunikabide askok landu dutela dio eta kezka iturri dela hori. “Eman zaion tratamendua iruditzen zait benetan oso-oso larria”, esan du. “Sare sozialak ere asko berotu dira, eta noski erizain eta emagin asko haserretu egin dira ez dutelako txosten horrekin bat egiten”.

Zer da doula bat

Alkortak azaltzen du Doula bat haurdunaldi aurretik erditze ostera arteko tartean familiari laguntza emozionala eskaintzen dion figura dela. “Nire ustez lanbide zaharrenetako bat da. Ez da emagina, ez da ginekologoa, ez da osasun langilea. Etapa horretan alboan dagoen esperientziadun figura hori da. Herrialde ez hain industrializatuetan oraindik ere ematen den figura”, azaltzen du.  “Gertatzen dena da doulak lan handia egiten ari direla jendea informatzeko. Erditze planak egiten laguntzen ari dira, eskubideen berri ematen dute, zer den legez kanpokoa esaten dizute… Eta badirudi profesional batzuei ez zaiela gustatzen emakumeok horrelako prozesu batean erabakitzeko gaitasuna dugula jakitea, nahiz eta pazientearen autonomia legeak horrela jaso”.