Aplikazioak jasotzen duen ataletako batek Haurrekin egitekoak du izenburua, eta une honetan familian egiteko moduko 142 mendi proposatzen dira bertan. Lurraldeka sailkatuta daude eta deskribapena, argazkiak, iraupenari buruzko informazio praktikoa eta erabiltzaileen iruzkinak agertzen dira bertan.

MENDIAK, Euskal Herriko mendiei buruzko aplikazioa da. “Mendizale arrunt eta familientzat pentsatutako aplikazioa da. APP erabilterraza, mendiaren alderdi ludikoena eta aisialdikoa bultzatu nahi dituena, bide batez, mendizaletasuna bera ere bultzatuz edo zirikatuz”, azaldu dute bultzatzaileek.

Hala, aplikazioa euskal mendizale guztiengan dago pentsatuta; txiki zein handi. Are gehiago, mendigoizale eta kirolari handientzat baino gehiago, familia eta zaletu ororentzat dago pentsatuta eta diseinatuta.

Irailean aurkeztu zuten Codesyntaxek garatutako aplikazioa, eta une honetan Euskal Herriko 1.500 gailur nagusien informazioa biltzen du. Euskaraz dago eta Androiderako dago garatuta. Play Storen jaitsi daiteke.

Ezaugarri eta helburu nagusiak

  1. Euskal Herriko mendi nagusien zerrendak, fitxak eta informazio praktikoa ematea: kokapena, altimetria, argazkiak, mapak, eta abar.
  2. Igotako mendiak markatu eta gordetzeko aukera ematea.
  3. Aplikazioak estatistika pertsonalak ematen dizkio erabiltzaileari (zeintzu mendi igo dituen, noiz, zenbat aldiz,…). Horrela, aplikazioa, nor berarentzat datu-base eta katalogo pertsonal modukoa ere izango da.

Horrekin batera, erabiltzaileek argazkiak igo ahalko dituzte eta baita mendiak puntuatu ere. Informazio guztia aplikazioan artxibatuta geratzen da, eta horrela erabiltzaile bakoitzak bere mendi-ibileren informazio guztia sakelekoan gordeta izango du.

Argazkiak eta informazioaren iturria hemen.