“Matxismo ezkutua, egunerokotasunean agerian” ikasleekin lantzeko dosierra sortu dute Aiaraldean

Matxismoa identifikatzeko ariketak plazaratzen ditu dosierra eta interneten zintzilikatu dute, edonoren eskura egon dadin. Haur Hezkuntzan, Lehen Hezkuntzan, DBHn, Batxilergoan zein gaztelekuetan lantzeko proposamenak dira.

Aiaraldea Ekintzen Faktoriako feminismo eta hezkuntza ildoek sortu dute matxismoa bistaratzeko tresna berria. Aiaraldeko hemezortzi hezkuntza zentroetan banatu da dagoeneko. Hala ere, interneten zintzilikatu dute lana, edonoren eskura egon dadin.

Dossierrak hainbat atal ditu: sarreraren eta kokapenaren ostean dator marko teorikoa, eta ondoren egunerokoan ezkutuko indarkeria matxista identifikatzeko zenbait egoera zerrendatzen dira. Eraldaketa egoerak azaleratzetik eta ikusgarritasuna ematetik hasten dela oinarri hartuta haurren, gazteen eta helduen artean.

Etapa bakoitzean burutzeko propio diseinatutako ariketak jasotzen ditu dossierak. Ariketa gehieneak hausnartzeko balio dute, eta helburuen artean nabarmentzen dira haurrak eta gazteak feminismoan heztea, emakumeen zapalkuntza sistematikoa ulertzea, gizonen pribilegioen inguruan hausnartzea, ezkutuan kokatzen den indarkeria azaleratzea edo emakumeen presentzia erdigunera eramatea.

Ariketekin batera askotariko euskarrietan dauden baliabideak eta tresnak jasotzen dira bertan: kantuak, ikus-entzunezkoak, irudiak, prentsan agertutako artikuluak…