Naizen Elkartea Araba, Bizkaia, Gipuzkoa eta Nafarroako adin txikiko transexualen familiak biltzen dituen elkarte bat da. Hainbat ekintza antolatzen dituzte, haien artean familientzako informazio puntuak edo ta elkarretaratzeak. Hileko lehen asteartean egiten dituzte Bilbo, Donostia, Iruñea edo Gasteizen. Hurrengo deialdia Abenduaren 10ean da, Arabako hiriburuan.

Bea Sever, Naizen Elkarteko bozeramailea

Adin txikiko transexualen familiak elkartzea garrantzitsua da?
Bai, gurasooi oso ondo etortzen zaizkigu horrelako topaguneak. Guraso berriak agertzen direnean sarritan haien beldurrak azaleratzen dituzte, eta beste guztion artean entzun eta aholkuak zein jarraibideak ematen dizkiegu. Zalantzak argitzeko, zure bide berdina aurretik egin duen pertsona batekin hitz egitea oso baliagarria da. Familia gehienek diote oso lagungarriak direla batzar hauek, terapia moduko bat… Elkartu, zalantzak argitu, negar egin…

Aurrerapauso handiak eman dira errealitate honen inguruan… baina oraindik lan asko dago aurretik?

Bai, oraindik aurrerapauso asko falta dira. Egia da Euskal Herri mailan jarrera oso ona dela, baina ezjakintasuna ere existitzen da oraindik ez baitute ia inon gaiaren inguruan hitz egiten. Gainera, Euskal Herritik kanpoko hiriburuetan, iraganean izerdiz lortutako eskubideak desagertzeko zorian daude, beraz asko borrokatu beharra dago oraindik.

Gure elkartearen helburu nagusia familien arteko babes sarea hedatzea eta elkarretaratze hauek horretarako dira. Baina horretatik kanpo egia da oraindik elkarte moduan lan handia dugula aurretik, bai erakundeekin, bai jendartearekin… Baina bai, informazioa ematen jarraituko dugu, errealitate hau lau haizetara aldarrikatzen!

Hezkuntzan txikitatik landu beharreko litzateke transexualitatea?
Bai, hezkuntzan guztiz integratua egon beharko litzateke, familia anitzekin dagoen bezala. Txikitatik landutako gaia izango balitz, bigarren hezkuntzan ez zen hainbesteko lanketarik egin beharko. Gure esperientziaren arabera, haur eta lehen hezkuntzan ez da arazorik egoten, arazoak nagusiagoak direnean hasten dira. Beraz, txikitatik ezagutzeak lana erraztuko luke. Bestalde, irakasleek sarritan ez dute formaziorik gai honen inguruan; haien ikasketetan ez baita lantzen. Beraz, haien kabuz informatzea da aukera bakarra. Idealena formazio integrala egotea izango litzateke. Eta ez bakarrik hezkuntza akademikoan, hezkuntza ez formalean ere; aisialdi taldeetan… Orain gizarte hezitzaile asko ari zaizkigu formazioak eskatzen, gaiaren inguruan jantzi nahi direlako eta oso ondo dago interes hori esparru ezberdinetan pisten joatea.

Noiz antolatzen dituzue familientzako elkarguneak?

Norbait gure informazio puntuetara etorri nahiko balitz, hileko lehen asteartean egiten ditugu elkarretaratzeak;Bilbo, Donostia, Iruñea edo Gasteizen, 19:00etatik 21:00etara. Informazio zehatzagoa gure Facebook edo  https://naizen.eus/eu/ webgunean topa dezakezue.