Agurtzane Ormatza: “Guru buruari plazera ematea denok dugun joera bat da, eta umeek ere ikasi egiten dute”

Zeintzuk dira umeen sexualitatearekin lotuta gurasoek egiten dizkizuten galdera ohikoenak?

Hiru multzo handi nabarmenduko nituzke. Bata litzake umeei zer, noiz eta zela kontatu kezkaren inguruan. Bigarren galdera multzoa umeen jokabideen ingurukoa da: jokabidea euren gorputzarekiko, besteenarekiko… Eta azken multzoa eta hiruretan kopuru txikienean ematen dena umearen identitate sexualaren inguruko galderek osatzen dute. Sei, zazpi edo zortzi urteko umeen gurasoak izan ohi dira eta datoz ikusten dutelako badela nahasmen bat umearengan.

Sexualitate kontuetan bada jokabide ez egokirik ume txikietan?

Jokabideen multzoan nahiko kezka sortzen du nork bere buruari plazera ematea. Denok dugun joera bat da eta umeek ikasi egiten dute euren gorputza ukituz. Plazerarekin topo egiten dutela esan daiteke. Zer gertatzen da? Guraso askok ez dakitela egoera zela kudeatu.

Umeei ez die egiten ez onik ez txarrik: bere gorputza ezagutzen ari dira eta plazera jorratzen. Aldamenean dauden gurasoei kostatzen zaie egoera kudeatzea, eta hortik dator, batez ere, ez egokitasuna

Zer egiten dugu? Ez ikusiarena egin ez dakidalako zela jokatu, edo ez egiteko esan. Baina horretan ere moduak eta moduak daude. Niretzat egokiena umearekin hitz egitea da, baina beste edozein unetan. Zer da plazera? Zerk ematen digu plazera? Zerk ez? Eta oso garrantzitsua da emozioei izena ipintzea.

Baina zenbait egoeratan deserosotasunak sortzen dira.

Bai, eta esango nuke eskoletan gehiago sortzen direla familietan baino. Jakin behar dugu umeek masturbaziora jotzen dutela askotan urduri daudenean edo aspertuta daudenean. Zergatik? Ba jokabide horrek lasaitu egiten dituelako. Zer gertatzen da? Jokabide horrek beste kideengan algara sortzen duela eta oztopoa hezitzailearengan ez dakielako zelan jokatu.
Lasaitzeko egiten badu lasaitzeko beste bide batzuk erakutsi behar dizkiogu. Plazerari buruz ere hitz egin daiteke umeekin. Baina mugak malguak izan behar direla uste dut.

Eta erakutsi behar diegu non dauden ezberdintzen?

Irakatsi baino bideak eman behar dizkiegu nork bere kabuz ikasteko. Esaterako, kakarekin eta pixarekin ondo desberdintzen dugu. Denok dakigu non egin behar diren. Batzuetan tokatuko da zuhaitz baten kontra egitea, eta ez da ezer gertatzen. Eta denok dugu argi kaka egitea ez dela txarra. Plazerarekin berdin gertatzen da. Umeek azaldu diezaiekegu badaudela toki batzuk gure intimitatea eta besteetan gehiago babesten dutenak. Baina batez ez esan plazera txarra denik!