Ostiralean ireki zituen ateak Birsortuk Arrasaten, Hik Hasi egitasmo pedagogikoaren eta Emaus Gizarte Fundazioaren proiektu berriak. Materialen berrarabilpena eta jasangarritasuna oinarri hartuta, heziketa, sormena eta kultura uztartuko dituen txokoa izateko bokazioz jaio da Birsortu.

BIRSORTU zabalik da

Hainbat ikastetxetako hezitzaileak, zenbait enpresatako ordezkariak, Maria Ubarretxena Arrasateko alkatea eta Maitane Muñoz Garapen Komunitarioko zinegotzia, Debagoienako Mankomunitateko ordezkariak eta hainbat herritar izan ziren Birsorturen ateak zeharkatu eta barruan zegoena ikusten lehenak. Ostiralean ireki baitzituen Birsortuk ateak, Arrasaten. 

Haurrek esperimentatzeko eta ikerketzeko duten grinaren pizgarri izateko eta sormena lantzeko proiektu berri bati ekin diote elkarrekin Hik Hasik eta Emaus Gizarte Fundazioak. Italiako Reggio Emiliako haur eskolen Remida proiektuan du oinarria egitasmoak eta honako helburua du: haurrekin prozesu hezitzaile, kultural eta sozial bat bultzatzea lortu nahi da, industriak baztertutako materialari balorea emanaz. 

Birsortu proiektua sormenean eta berrarabilitako objektuen ikerketan zentratutako proiektu kultural, pedagogiko eta jasangarria da; zeinak Reggio Emiliako Remida proiektua duen oinarri.

Mikel Agirrezabala Hik Hasiko formazio arduraduna eta Sheila Padrones Emauseko hezkuntza teknikaria dira Birsorturen arduradunak eta bi aldeen arteko lankidetzaz gain, proiektua aurrera eramateko izan duten laguntza eta harrera azpimarratu dituzte. Enpresez gain, HUHEZIren lankidetza ere izan du Birsortuk. Bestalde, proiektua aurrera ateratzeko eta bideragarri egiteko Gipuzkoako Foru Aldundiaren aldetik jaso duten babesa nabarmendu dute arduradunek.

Momentuz Debagoienako ikastetxeek eta iaz Birsorturen esperientzia pilotuan parte hartu zuten 13 ikastetxeek edukiko dute asteazken arratsaldero Birsortura hurbiltzeko aukera. Inaugurazio ekitaldian Itsaso Pagoaga Arrasateko Olgeta jostailu dendako kideak zenbait material hartu eta gardenki baten gainean jarriz askotariko gauzak egin daitezkeela erakutsi zuen.

Proiektuari buruzko xehetasun daude hik hasiren 243. zenbakian argitaratutako erreportajean.

Hik hasi egitasmaren wgunetik ekarritako albistea.