Eusko Jaurlaritzako Kultura eta Hizkuntza Politika Sailak eLiburutegia, liburutegi digitala, edonoren eskura jarri du, aldi baterako. Hala, erabiltzaileek 20.000 liburu digital eta 15.000 film baino gehiagoko katalogo bat dute eskura. Tartean, nola ez, haur eta gazteentzako atalak ere badaude. Aukera interesgarria da itxialdi egunotarako.

Liburutegi digital horretan sartzeko, Euskadiko Irakurketa Publikoko Sareko bazkide izan behar da, eta nahikoa da liburutegiko gainerako zerbitzuetara sartzeko erabiltzen diren ohiko datuak sartzearekin (bazkide-zenbakia eta pasahitza, hau da, erabiltzaileek bazkide egitean jasotzen dituzten datuak).

Jakinik pertsona askok pasahitzik ez dutela eta herritar guztiei eLiburutegian sartzea errazteko Kultura eta Hizkuntza Politika Sailak liburutegi-zerbitzua@euskadi.eus helbide elektronikoa jarri du, aldi baterako. Horrela, eLiburutegira sartzeko gakoa ez duten Euskadiko Irakurketa Publikoko Sareko erabiltzaileek helbide horretan eskatu ahal izango dute.

Era berean, Irakurketa Sare Publikoko bazkide ez direnek bazkide egiteko aukera izango dute, liburutegiko txartela eta eLiburutegian sartzeko pasahitza eskuratuta. Azken egunetan, eLiburutegiko “maileguak bikoiztu” egin direla adierazi dute Jaurlaritzatik.

Helbide elektroniko horrek aldi baterako eskainiko du aukera hori, egoera normalizatu arte.

eliburutegia.euskadi.eus helbidean sartuta, Euskadiko Irakurketa Publikoko sareko liburutegietako bazkideek 20.000 liburu digital eta 15.000 film baino gehiagoko katalogo bat izango dute eskura. Liburuak ordenagailu, tablet zein eBook bidez irakur daitezke.

Herritar bakoitzak hilean lau liburu irakurtzeko eta astero bi film ikusteko aukera du eLiburutegian. Honako helbide honetan azaltzen da nola deskargatu eduki digitalak gailu elektronikoetan: www.eliburutegia.euskadi.eus/descarga-en-epub