Vanessa Gonzalez Moya: “Egoera honetan, kultura zirrikitu guztietatik irteten ari da”

Vanessa Gonzalez Moya Kontukabi taldeko kidea da, Maider Alzelai eta Igor Salarekin batera. Egun hauetan, Gonzalezen audio-ipuina sare sozialetan asko partekatu da eta badira audio-ipuin gehiagoren eske dabiltzan herritarrak.

Audio-ipuinak arrakasta handia izan du… Espero zenuen?
Ez, ez… hiruzpalau laguni bidali nien, umeak dituztelako eta hauek entretenitzeko modu ona izan zitekelakoan. Nagusiei ere gustatzen zaie. Orain dela gutxi ipuinen topaketa izan behar zen eta bertan behera geratu da, eta parte hartu behar genuenen artean, facebooken bideoak zintzilikatzen ibili dira. Nik audio-ipuinak prestatuta nituen, lagunen artean partekatzeko, eta pixkanaka zabaltzen joan dira! Gaur sorpresa hartu dut hainbeste pertsonei heldu dela pentsatzearekin! Baina ipuina hainbeste belarrietara heltzea jakitea plazer bat da niretzat.

Kulturaren eraldaketa garaia al da?

Kultura zirrikitu guztietatik irteten dabil. Hainbat kultur ekintza bertan behera geratu dira, baina jendea sare sozialetan mugitzen ari da eta gauza politak irtetzen ari dira. Formatu txikian ari gara, baina leiho handia bilakatzen ari da, niretzako magikoa da!

‘Kontukabi’ taldearen kide zara, zertan datza?
Hiru kide gara, Maider Alzelai, Igor Sala eta hirurok. Igorrek zuzeneko musika jotzen du gurekin, eta guk ipuin antzeztu musikatua egiten dugu. Antzerkia barneratzen dugu zuzeneko musikak goxotasun bat ematen dio. Oso pozik gabiltza. Gai ezberdinetako ipuinak egiten ditugu: indarkeriaren inguruko ipuinak, emakumearen egunerako ipuinak… Beti gustatzen zaigu, hori bai, zuzeneko musikarekin lan egitea.

Hitzordu online bat prest al duzue?
Sortze prozesuan gabiltza. Ideia asko ditugu eta lanean gabiltza, ea laster zerbait argitaratzen dugun! Aurrerapausoak ematen joan ahala, gure Kontukabi facebook kontuan iragarriko dugu. Bitartean zaindu eta ipuinetaz gozatu!