Ikasi egitasmo pedagogikoak orain hiru urte sortutako egitasmoak labean du 13. zenbakia.

 OLYMPUS DIGITAL CAMERA

Gurasoei, hezitzaileei eta familiei bideratutako aldizkaria da Hazi Hezi. Ikasi egitasmo pedagogikoak sortu zuen orain hiru urte. “Heziketa komunitate guztiaren egitekoa dela ulertzen dugu. Guztiei zuzenduta dago Hazi Hezi: gurasoak, hezitzaileak, aitona-amonak, izeba-osabak…”, dio Hazi Hezi aldizkariko arduradun Arantzazu Muñoak. Azaltzen du Ikasi egitasmoak badaukala Ikasi aldizkaria. “Bereziki heziketara eta eskoletako profesionaletara zuzenduta dago, baina konturatu ginen heziketa ez dela soilik eskolaren egitekoa. Eskolarako jarrera eta balio batzuk lantzen ari baginen hori osatzeko garrantzitsua zela familiekin elkarlanean aritzea. Hutsune hori betetzeko, euskaraz beti ere, sortu genuen Hazi Hezi”, adierazi du.

Hazi Hezi aldizkarian adituen esanak eskaintzen dituzte neurri handi batean. “Bitartekari lana egiten dugu adituen eta familien edo publikoaren artean. Saiatzen garena da informazioa kontrastatua izaten, atzetik sostenu bat izaten. Gure taldetik pasatzen da informazio hori eta gero gure hitzetan ematen dugu aldizkarian. Pedagogoak, pediatrak, dietista, sexologoak… harremanetan gaude eta haien hitzak sartzen ditugu baina ez soilik haiena. Familiena ere bai direla gurasoak, aitona-amonak, anai-arrebak… Haien testigantzak ere ekarri nahi ditugu Hazi Hezi-ra”, azaltzen du Muñoak.

Hiru hilabetekaria euskaraz

Hiru hilean behin kaleratzen dute Hazi Hezi aldizkaria, eta 13. zenbakia dute uneotan labean. Udan kaleratuko dute. Harpidetza bitartez lor daiteke Hazi Hezi aldizkaria. Urteko harpidetza 20 euro da, eta Ikasiko harpidedun izanez gero 15 euro. Facebook bitartez jarrai daiteke, eta aukera ematen dute buletina jasotzeko.

12. zenbakian, esaterako, haurdunaldiaren jabe izatearen gaia aukeratu dute azalerako. Estitxu Fernandez komunikatzailea eta sexologoaren hausnarketa jasotzen dute: “Zaila da erditzearen jabe egitea haurdunaldiaren jabe izan ez bagara”. Izaskun Zubizarreta emaginarekin ere egon dira eta baita ere Elixabete Imazekin. Elkarrizketa nagusian Iruñako haurreskoletako tailer gidari Alfredo Hoyuelos da protagonista. Eta eztabaida nagusian hizkuntzen irakaskuntzaren gaia aukeratu dute. Umetan hasita hobeto ikasten da atzerriko hizkuntza bat?

Argazkiaren iturria hemen.

Hona hemen Arantzazu Muñoari egindako elkarrizketa.