Montse Velasco sexologoa: “Gehienbat komunikazio ez berbalean transmititzen diegu informazioa”

Sexualitateaz nahiko hitz egiten dugu seme alabekin?
Uste baino gehiago, gehienbat komunikazio ez berbalean transmititzen diegu informazioa.

Sexologia zerbitzuan guraso asko joaten zaizkizu aholku/tresna eske?
Gutxi batzuk bai, baina ia gehienetan gaztea bera hurbiltzen da aholku bila.

Zeintzuk dira sexualitate aske eta osasuntsu batek izan beharko lituzkeen ezaugarriak?
Pertsona bakoitzak bizi biografia desberdina du, hau da, bizitzan zehar ditugun esperientzien arabera gure pertsonalitatea eraikitzen den bezala, gure sexualitatea bizitzeko modua ere eraikitzen da. Jaiotzen garenetik hil arteko prozesu bat da.

Hau kontutan izanik, sexualitatea modu aske eta osasuntsu baten bizitzeko, bakoitzaren sentsazioak, sentimenduak, pentsamenduak, gustuak… errespetatu beharko genituzke. Desberdintasuna balore izanik, pertsona izateko modu diferente eta “normal” asko daudela onartu behar dugu.

Bakoitzak bere sexualitatea bizitzeko modua errespetatzen badu, beste pertsona batzuen sexualitatea bizitzeko modua ere ulertzea eta errespetatzea posible izango du.

Hiru adin tarte bereizi dituzue Arrasaten antolatutako gurasoentzako saioetan. Kontutan izan beharreko hiru fase bereiz ditzakegu?
Adin tarte hauek bereizteak antolamendu gauza da gehienbat. Agian, 6-12 eta 13-18 urte bitarteko taldeetan nahiko orokorra da haur eta gazteetan ematen diren aldaketak (pentsamenduak, gorputza…). Baina 0-5 urte bitarteko haurretan aldaketa ugari daudela esan beharko genuke. Dakigunez, pertsona baten bizitzako lehen hiru urteak oso garrantzitsuak dira eta aldaketa asko ematen direla nabaritzen dugu (ikusi, ibili, hitz egin…).

Aurrekoan esan bezala, pertsona bakoitzak erritmo konkretu bat darama bere garapenean eta nahiz eta erremintak modu orokor baten eskaini, bakoitzak bere kasu konkretura egokitu beharko lituzke.

Maiatzerako Arrasateko udal sexologia zerbitzuak gurasoendako antolatu dituen formazio saioen inguruko informazioa hemen.