OarsoIrria aisialdi proiektuak haurren adierazpen espazio bat zabaldu zuen beraien sormen lanak eta mezuak publikatzeko.

“Zer esan nahi diozu munduari? Bidali zure ekarpena”.

Herritik sortu eta bizitzen den aisialdiaren aldeko apustua egiten du beste behin ere OarsoIrria proiektuak, parte-hartzea eta auzolana uztartuz. Alarma eta konfinamendu egoerak haurren eta beraien zaintzaileen beharrak zapaltzen dituela iritzita, Leihoa zabalik ekimena jarri zuen abian.

Euskal Herriko haur guztiei irekita

Euskal Herri osoko haur eta nerabeen ekarpenak jasoko dituzte: marrazki, ipuin, bertso, poesia, eskulan, argazki, abesti, audio, iritzi… Eta ondoren beraien webgunean argitaratzen saiatuko dira, beste herritarrekin partekatzeko. “Etxeko txikien ahotsa plazaratzea oso garrantzitsua iruditzen zaigu. Hauxe da egoera honetan gure komunitateak egiten duen ekarpen xumea”, adierazi dute.

Hona hemen egitasmoaren aurkezpena:

Etxeetan igaro behar ditugun egun hauek ikusita Oiartzungo Abaraxka ludoteka eta Oarsoirriak ekimenetik proposamena luzatu dute.

Zer esan nahi diozu munduari? egun hauetan egiten dituzun, marrazki, ipuin, bertso, poesia, eskulan, argazki, abesti, audio, iritzia… guri bidali eta oarsoirriak@gmail.com helbidera eta guk poliki poliki Abaraxkako blogera eta OarsoIrriko webgunera igoko ditugu. Modu honetara zuek guztiok kontuan hartuaz eta plazaratzeko aukera eskainiaz.

Mezuan ondorengo informazioa adierazi beharko duzue: egin duzuenaren azalpentxoa, lanaren izenburua, zuen izena (eta, izen erreala jarri nahi ez baduzue, ezizen artistikoa asmatu dezakezue), herria, eta partekatu nahi duzuen materiala. Zuen, adinez txikiak zaretenon, irudirik balego, bai zuen baimena eta bai zuen gurasoena behar dugu. Beraz, orri hau  deskargatu eta sinatu ondoren, publikatu nahi duzuenarekin batera bidali beharko diguzue.

Eta ez ahaztu, denon artean lortuko dugu! GORA IRRIA!!!!

Helduentzako argibideak

Kaixo lagun,

Haurrentzako adierazpen espazioa zabaldu nahi duguOiartzungo Abaraxka ludoteka eta Oarsoirriak ekimenetik proposamentxo bat dugu zuontzat, hau da, etxeko txikitxoentzat.

Galdetuiezue ea beste pertsona batzuekin zerbait konpartitu nahi duten, sormena lan horretan (marrazkia, ipuin, bertsoa…) eta prozesuan jarrita. Haurra bera izan behar da gidari, nahi duen hori sortuaz, eta askatasuna ematea proposatzen da. Arreta bidean jartzea gonbidatzen dizuegu, elkarrekin bizitzen ari zareten horretan.

Adin txikikoen irudiak agertzen badira, zuen baimena beharko dugu. Horretarako, hauxe eskatzen dizuegu: bidaltzekoa den lanarekin batera goian aipatutako orria sinatzeko, argazki bat ateratzeko eta haurraren ekarpenarekin batera bidaltzeko adierazitako gmaileko helbidera. Kasu honetan, kontuan hartu ezazue haurraren irudia publikoki zabalduko dela.