Oinherrik Euskal Herriko haurren aldeko txalo zaparrada antolatu du apirilaren 26rako. Ekimen honen asmoa da, 12:00etan, herritarrek haurren eskubideak aldarrikatzea eta baita ere, orain arte erakutsi duten jarrera zoriontzea. Oinherrik gai honen inguruko manifestua kaleratu zuen eta manifestu horri atxikimendua emateko formularioa ere eskura jarri du.

Oinherrik haurtzaroaren alde egiteko helburuarekin sortu du manifestua eta bertan hainbat aldarrikapen egin ditu: haurrak ikusgai bihurtzearen beharra, haurren eskubideen adierazpena, haurtzaroa eta nerabezaroa oraina izatea, haurtzaro eta gaztaro osasuntsu baten garapenerako naturak duen presentzia, umeen hitza entzun eta umeei hitza ematea, haurrek herri eta hirietako kaleak hartzeko beharra, haur eta nerabeen erronkak eta haurraren eskola.