Igandetik aurrera bizitokitik kilometro bateko eremuan ibili ahalko dira umeak egunean behin, Hego Euskal Herrian. Norbere bizitokia aukeratu eta aipatutako eremua bistaratzeko aukera ematen du Gaindegiak eskeinitako mapa interaktiboak.

Espainiako Gobernuak haurren konfinamendua arintzeko ezarri dituen neurriak igandean goizeko 9etan jarriko dira indarrean.

Espainiako Gobernuak azalpen-gida bat argitaratuko duela iragarri du, baina, bitartean ondorengo arau zehatz hauek zabaldu ditu, hona hemen Argian irakurri ditugunak.

– Haurrak (0 eta 14 urte bitartekoak) heldu batek (18 urtetik gorakoa) lagunduta irtengo dira. Helduak ez du zertan gurasoa izan behar.

 – Helduarekin batera gehienez hiru haur joan daitezke.

 – Haur bakoitza egunean behin bakarrik irten ahal izango da ordubetez.

 – Ibilaldiaren ordutegia: goizeko 9ak eta gaueko 21:00 artean egin behar da. Gobernuak puntako orduak saihestea gomendatzen du.

 – Baimendutako distantziarik handiena haurraren bizilekutik kilometro batera da.

 – Jostailuekin edo patineteekin atera daitezke. Ezin izango dituzte haur-parkeak eta eremu komunak erabili.

 – Osasun Sailak gomendatu du haurrek pertsonen arteko distantziari eustea ibilaldietan eta eskuak ondo garbitzea.

 – Haurrentzako maskarak erabiltzea ez da nahitaezkoa, baina gomendagarria da aurreko bi gomendioak ezin direnean bete.

 – Basoetan edo hondartzetan paseatu ahal izango dute, aurreko baldintza eta gomendioei jarraituz.

 – Bizilagunen komunitateetako eremu komunei dagokienez, haurrek ezin izango dute jostailurik partekatu, ezta beste haur batzuek erabiltzen duten instalaziorik erabili ere.

 – 15 eta 18 urte bitarteko adingabeak kalera irten daitezke alarma-egoeran helduek egiten zituzten zereginetarako: erosketak supermerkatuan, farmazian, bankura joan…

– Pablo Iglesiasek argi utzi du ez dela paseatzera atera beharko familia liburua eskuan hartuta, “herritarren zentzu zibikoan” azpimarra jarrita. Polizia-kontrolik egingo ez dutela uler liteke, nahiz eta azken asteotako isun kopuru handia kontuan izanik, ez den oso sinesgarria, momentuz.