Aretxabaletako, Arrasateko, Aramaioko, Eskoriatzako, Legazpiko, Oñatiko eta Bergarako bibliotekek elkarlanean egindako gidan 39 liburu, lau disko eta sei pelikula proposatzen dira. Guztiak, 2020an edo 2019 bukaeran argitaratutako lanak dira. Euskarazko eta gaztelerazko lanak dira.

26. urtez dago eskuragarri oporretarako liburuen, diskoen eta pelikulen gida. Adinaren arabera, bost ataletan banatu dituzte liburu proposamenak: 0-5 urte artekoak, 6-8 urte artekoak, 9 urtetik gorakoak, gazteak eta helduak. Liburu bakoitzak erreseiña dauka: egilearen datuak, argitaletxea eta argumentuaren laburpena. Batzuek marrazkiak eta ilustrazioak dituzte, beste batzuek, gehienbat, testua.

Helduentzako eta gazteentzako askotariko generoetakoak daude. Adibidez, Kirmen Uriberen 17 segundo poesia liburua; Karmele Jaioren Aitaren etxea eleberria; eta Zigor Aldamaren Adios a Mongolia bidaia liburua.

Pelikulak eta diskoak

Liherren Hemen herensugeak daude, Angel Olsenen All mirrors eta Mykurren Folkesange dira proposatzen diren diskoak. Eta, pelikulak dira: 1917, O que arde, Roma, Los miserables, Sorry we miss you eta El faro.

Bi euskarritan

Udako Biblioporrak gida eskuratzeko bi aukera daude. Alde batetik, ekimenean parte hartu duten bibliotekatan bertan, papereko euskarrian. Beste alde batetik, bibliotekatako webguneetatik deskargatzeko aukera dago.