Hamar urteko ibilbidea bete berri du Guraso.eus atariak. Gurasoen premiak asetzeko gunea izaten jarraitzeko, ordea, berrikuntzak egin dituzte plataforma digitalean eta garai berrietara egokitu dira.

Guztiz berritu dute Guraso.eus eta gaur egun oso erabiliak diren gailu eramangarrietarako ere egokitu dute: mugikorrak, tabletak eta abar.

Arrasateko Txatxilipurdi elkartea eta Goiena Komunikazio Taldea daude egitasmoaren atzean. Proiektuak Arrasateko Udalaren, Gipuzkoako Foru Aldundiaren eta Eusko Jaurlaritzaren laguntza jasotzen du.

Euskara hutsean dago webgunea, eta eguneroko maiztasuna du eduki ekoizpenean. Gurasotasuna eta heziketa dira ardatza, jakina. Askotariko gaietan adituak eta arituak diren kolaboratzaile sare zabala da Guraso.eus atariaren bereizgarri nagusia.

Garrantzia dute, baita ere, aktualitatearekin lotutako albisteek eta elkarrizketek, aisialdira begirako proposamenek –familia planak, eskulanak, jolas proposamenak, errezetak…–, hitzorduen agenda berrituak edota multimedia atalak non ikus-entzunezkoak, Gurasoak irratsaioa eta argazki galeriak jasotzen diren.

Informazioa jasotzeko aukera zabala eskaintzen du atariak, kanal anitzeko plataforma baita: Guraso.eus ataria, Twitter kanala, Facebook orria eta eposta bidez jaso daitekeen hilabetekaria ditu.

Guraso.eus, gainera, ez da norantz bakarreko komunikazio kanala; izan ere, aukera ematen du artikuluetan iruzkinak egiteko eta Galdetu adituari atalaren bitartez kolaboratzaile sare zabaleko edozein adituri zuzeneko kontsulta egiteko.

CodeSyntax-ek garatu du alde teknikoa teknologia dinamikoa eta aurreratua erabiliz.