2016an sortu zuten Haurren mugimendu askea facebook taldea. Helburua zen haurren mugimendu askeari buruzko artikuluak eta informazioa partekatzeko gune izatea. Kezkak eta zalantzak argitzeko talde dinamikoa izatea. Egun, 1.875 pertsona batu dira taldera.

Facebook taldean hezitzaileak daude. Baita gurasoak, eta beste profil batzuetako pertsonak. Bada, guztiek dute jomugan, haurrek izan beharko luketen mugimendu askatasuna. “Emmi Pikler Vienan jaiotako pediatra bat izan zen, eta 1930eko hamarkadan Budapesten jardun zuen. Uste zuen garrantzitsua zela haurra ahalik eta autonomoena izatea, eta uste zuen garrantzitsua zela askatasuna ematea egoerak bere kabuz konpontzeko. Erreferente da guretzat”, esan du Facebookeko taldea sortu zuen Naiara Ormazabalek.

0-3 urte artekoak

Bereziki 0-3 urte arteko haurren garapenean eragin gura dute. Arauetatik harago haurrak izan behar dute beraien mugimenduak garatzearen arduradunak. “Ume ibiltzen hasten denean, bera izan dadila lurretik altxatzen ahalegintzen dena. Guk, eskolan, etzan egiten ditugu, eta beraien kabuz hasten dira lehen urratsak ematen. Ez ditugu eskutik oratzen. Gauza bera, bazkaltzerako orduan. Umeak gehiago jan ez duela esaten duenean, bukatu da bazkari ordua. Zergatik eman behar diogu umeari berak nahi duena baino gehiago? Haurrak bere kabuz ikasi behar du asetzen”, dio Ormazabalek.

Artikuluak partekatu

Interes berberak dituzten pertsonen artean informazioa partekatzeko asmoz sortutako taldea izanik, helburuak betetzen doazela uste du Ormazabalek. Artikuluak, albisteak, elkarrizketak…. horiek guztiak igo daitezke Facebookera. Interesa duen edonork egin dezake ekarpenen bat. “Era berean, gai baten inguruan zalantzaren bat edo kezkaren bat dutenek ere galderak egiten dituzte. Gainerakoak ahalegintzen gara erantzuna ematen, edo gutxienez laguntza eskaintzen”.