LAB, Steilas, ELA, CCOO eta UGT sindikatuek ohar bateratua argitaratu dute Eusko Jaurlaritzako Hezkuntza Sailaren jarduna salatzeko eta egoera aldatu ezean mobilizazioak egingo dituztela jakinarazteko. Langileen ordezkariekin “interlokuzioa eta negoziazioa” bideratzeko eskatu diote Jaurlaritzari.

Azaldu dutenez, dagoeneko Hezkuntza Sailak hainbat murrizketa egin ditu hezkuntza publikoaren alorrean; adibidez, IRALEko ikastaroetan, Euskal Girotze barnetegietan, ikastetxeetara helarazi diren lanpostu zerrendetan edota ikastetxeetako beharren indizeek sortutako errefortzuetan. Erabakia “aldebakarrekoa” eta “inposatua” izan dela salatu dute sindikatuek: “Sindikatuoi zuzenean ezer jakinarazi ez digun arren, ikastetxeetatik jasotzen ari garen berrien arabera, datorren ikasturteari begira murrizketak aplikatzen hasiak dira hainbat arlo eta kolektibotan”.

Bestetik, langileen ordezkariek aurreratu dutenez, Hezkuntza Sailaren erabakiak eragina izango du sukalde eta jantokietan, heziketa berezian eta hezkuntza laguntza espezialisten kolektiboan, terapeuta okupazionaletan eta Haurreskolak Partzuergoan, besteak beste. Sindikatuen ustez, ez-ohiko egoera kudeatzeko, ordea, beharrezkoak diren baliabideak gehitu behar dira murrizketak aplikatu ordez:  “Gure gizartea osatzeko ezinbesteko kohesiorako tresna den hezkuntza publikoan inbertitu behar da. Argi gelditu den bezala, hezkuntza publiko indartsu bat gizartean jatorriz dauden desorekak konpentsatzeko tresna aparta da, ikastetxeetan edukien transmisiotik harago doan praktika batean aritzen gara-eta”.

Aurrekontuak doitzeko eskaera

Aurrekoari lotuta, sindikatuek hezkuntza publikorako inbertsioa handitzeko –eta hala,  aurrekontuak moldatzeko– eskatu dute oharrean, “orain premiazkoak bilakatu diren behar eta hutsuneei erantzuteko”. Neurri zehatzagoei dagokienez, ratioak jaistea eta plantillak handitzea beharrezkotzat jo dute, eta baita Haurreskolak Partzuergoko doakotasuna, hezkuntza premia berezirako baliabideak handitzea, eta gainerako profesionalen lana bermatzea ere: pedagogo eta terapeutak, garbitzaileak, sukaldariak eta jantokiko arduradunak…

Bestalde, langileen baldintzak hobetzeko neurriak ere eskatu dituzte sindikatuek; hala nola, lan zama arintzeko neurriak, langileen erretiroa ahalbidetzeko gazte-berritze plana, behin-behineko langileen bermedun kontsolidazioa, kontziliaziorako neurriak, arrakala digitalari modu hobean erantzuteko materiala eta formakuntza eta euskara errefortzua indartzea.

Eskaerak ukatuz gero, mobilizazioak

“Gasteizko gobernuak erabaki guztiak aldebakarrez hartu ditu. Behin eta berriro salatu badugu ere, egoera berdinean gaude, hezkuntza publikoko sindikatuekin inolako hartu emanik izan gabe, inolako negoziaziorako bideak erraztu gabe jarraitzen du-eta”, adierazi dute sindikatuek. Gauzak horrela, esan dutenez, Jaurlaritzak eskaerei muzin egiten badie, erantzun “sendo” eta “bateratua” emango dute.

Inbertsioa, gomendatutakoaren azpitik

LAB, Steilas, ELA, CCOO eta UGT sindikatuek azaldu dutenez, hezkuntza publikoak “bere funtzioa bete dezan” gobernuaren inbertsioa behar du. UNESCOk  BPGren %6 izan dadin gomendatzen du, eta 2019an, %3,5 izan zen Jaurlaritzak egindako inbertsioa. “Orain inoiz baino gehiago UNESCOk gomendatzen duen inbertsioa eskatzen dugu hezkuntza publikorako. Soilik horrela bermatu ahalko ditugu momentu honetan ezinbestekoak diren giza baliabideak zein bitarteko materialak”, esan dute sindikatuek.