Gurasoentzako euskarazko eduki, hausnarketak eta baliabideak eskaintzen bidelagun dugu azken urteetan era.eus egitasmoa. Argitaratu berri duten “Jolasean blai”  jolas proposamena aitzakiatzat erabili dugu egitasmoko arduradunei elkarrizketa egiteko.

Nafarroako toki-entitateetako 28 euskara zerbitzuek sortu zenuten Era.eus 2017an. Nola baloratzen duzue egindako bidea?

Pozik gaude orain arte egindakoarekin, baina oraindik hasi berritan gaude. Lan handia dugu aurretik.  

Hasiera-hasieran, hainbat helburu jarri genion geure buruari eta ez nolanahikoak: webgunea kalitatezko edukiz eta baliabidez hornitu nahi genuen eta lan handia egin dugu. Azken finean, irakurleak fidelizatu nahi badituzu, beraien beharretara egokitu behar duzu eta baliabideak eskaini. Ostegunero artikulu bat argitaratzen dugu, gurasoen kezka eta beharrei erantzuteko, edota interesgarri suertatuko zaizkien gaien berri emateko. Horrez gain, haurrekin lantzeko hamaika material hautatu eta sailkatu ditugu: marrazki bizidunetatik bideo-ipuinetara; aho-korapilotatik App-etara; eskolaz kanpo eskaintzatik sehaska kantuetara… Denetik dago. Dena helburu honekin: haurren euskararen ikaskuntza prozesua osatzea.

Uste dugu bide zuzenetik goazela, baina familia guztien erreferente izan nahiko genuke. ERA guraso guztiendako tresna bat da, euskara jakin ala ez, eta hor nabaritzen dugu oraindik badela zer egin handia. Izan ere,  euskara ez dakiten gurasoak gehiago dira Nafarroan eta webgunera sartzen den bisita kopurua azterturik, euskara dakitenek gehiago erabiltzen dute webgunea.

Haurren euskararen ikaskuntza prozesua osatzeko, aberasteko eta biribiltzeko asmoz sortu genuen ERA eta horretarako, gurasoei informazioa eta baliabideak eskaintzen dizkiegu, euskara dakitenei modu batera eta ez dakitenei edota ikasten ari direnei, bestera. 

Gaur egun haur eta nerabeak interneten dabiltzala eta bertako edukiak kontsumitzen dituztela errealitate bat da. Zuek kontsumo hau euskaraz izateko baliabide sorta polita bildu duzue.

Estrategikoa iruditzen zaizue haur eta nerabeentzako edukiak euskaraz ere egotea?

Bai, noski, estrategikoa da edukiak euskaraz egotea. Kontsumo-bide berrietara egokitu behar dute hizkuntzek, gizarte-funtzio guztiak bete nahi badituzte. Biziberritze bidean dauden hizkuntzen kasuan, are garrantzitsuagoa da, funtzio batzuk dagoeneko desplazatuak izaten dituztelako.

Baina gauza bat argitu nahiko genuke: Era.eus ez da eremu digitalera mugatzen. Baliabideak familien eskura jartzeko webgune bat sortu behar zela argi ikusi genuen. Baina proiektu honen eragin-eremua ez da esklusiboki Sarea. Berez, webgunearen atalek islatzen duten bezala, 3 eragin-gune nagusi ditu: etxea, eskola eta aisialdia.

Helburua ez da pantaila bidez kontsumitzeko baliabideak sortzea, edo toki batean biltzea, baizik eta euskaraz ikasten duten haurrek beraien egunerokoan euskaraz aritzeko baliabideak familien eskura jartzea. Hori dela eta, webgunean online-baliabideak bildu ditugu, baina horrez gain, aurrez aurreko ekitaldien agenda aberatsa dago, eskolaz kanpoko euskarazko jardueren berri ematen da, udalekuen eta hiri-tailerren berri, gurasoei ipuinak kontatzeko aholkuak ematen zaizkie, auto bidaia luzeetan dibertitzeko aho-korapilo edota jolasak proposatzen dira…

Azken urteetan kultur sortzaile ezberdinek sarean zabaldu dituzten  euskarazko baliabide hauek oinarri hartuta sortu duzue  jolasean blai.

Zein da jolasteko egiten duzuen proposamena? Bakoitzak bere erritmora jolastu dezake?

Sortzaileek sekulako lana egiten dute eta hortik abiatu gara. Alegia, sormena beraiei aitortu behar zaie. ERAk kultur-baliabide horiek erabiltzeko proposatzen du. Konfinamenduan hasi ginen: egunero-egunero argitaratu genuen kultur-proposamen bat Era.eus-en, konfinamendua hasi eta maiatzaren 29ra arte. Horien artean, 50 hautatu eta Jolasean Blai dinamikara eraman ditugu. Mahai-joko baten itxura du, ibilbide bat proposatzen duena, baina arauak ez dira zurrunak. Egunero laukitxo bat aurrera egin behar da eta bertan agertzen denari heldu: film bat ikusi, App batean jolastu… Baina dadoak bota eta zoriak dioen laukitxora mugitzea ere aukera bat da, noski. Aukerarik onena, jakina, ibilbideko 31 laukitxoetatik pasatzea da, baita  bukaerako formulariotxoa betetzea ere, zozketa batean parte hartzeko aukera baitago.

Dinamikak, bada, aukera bat baino gehiago ematen du: laukitxo gehienek bina proposamen dute: bata luzexeagoa, bestea motzagoa. Horrela, unearen arabera hobekien heldu zaizuna aukeratu dezakezu.

Askotariko planak ditu, 5 kategoriatan sailkatuak: musika, emanaldiak, bideo-ipuinak, appak eta sopresa-kutxa.

Formatuari dagokionez ere, online jokatzen ahal da, edota PDFa zuri-beltzean deskargatuta. Horrela, aurrera egin ahala, laukitxoak koloreztatzen ahal dira.

Haurrek nahiko modu autonomoan aritzeko moduko jolasa da oro har, baina aldi berean familiarekin batera gozatu daiteke.

Badugu buruan jolasaren hurrengo bertsioa. Tematika berriekin, hautaketa berriekin, gurasoekiko elkarrekintza handiagoa eskatzen duena.

Gurasoentzako hausnarketa eta eduki proposamenak ere argitaratzen dituzue. Gurasoentzako euskarazko helduleku birtualak beharrezko direla uste duzue?

Informazioa kontsultatzeko jendeak erabiltzen dituen euskarrietara eta ohituretara egokitzea ezinbestekoa da. Era.eus plataforma gurasogai eta 12 urte bitarteko haurren gurasoei zuzenduta dagoenez, publiko horren ezaugarrietara eta ohituretara egokitu beharko duzu.  

Dena den, kanala baino, bestelako kontu batzuk azpimarratuko genituzke. Haurren euskararen ikaskuntza prozesua osatzeko, guraso guztiek asko egin dezaketela nabarmendu nahi dugu, euskara jakin ala ez. ERA bide horretan laguntzeko, baliabideak eskura jartzeko eta zalantzak argitzeko sortu da. Erabilgarria eta funtzionala da, alegia, bere asmoa ez da gurasoak gogoeta egitera bultzatzea, baizik eta gogoetatik ekintzetara pasatzeko jauzia erraztea. Eskolaz kanpoko jarduerak euskaraz egitearen onurak azaltzen dizkiegu, bai, eta jarraian euskarazko jardueren eskaintzaren berri ematen diegu.