Ttipi ttapa, Jaizkibelen

Jaizkibel Gipuzkoako ipar-ekialdean dagoen mendia da, Higer lurmuturretik Pasaiako badiaraino luzatzen dena.

Autoz sar daiteke bertaraino. Iristeko bi aukera daude: Hondarribitik gora abiatuta edo Lezotik Pasai Donibanera joanda. Lezo atzean utzi eta Pasai Donibanera iritsi aurretik, eskuinetara, GI-3440 errepidetik Jaizkibelera doan errepidea hartu eta begiratokira igoko gara. GI-3440 errepideko 10. kilometroaren ondoren, aparkalekua eta behatokia dagoen paradore zaharra daude.

Ibilbide zirkularreko txangoa

Jaizkibel paraje ederra da eta seinaleztatutako askotariko xendak ditu. Gaurkoan 7,84 kilometroko ibilbide zirkularra proposatzen dizuegu, eta zailtasun maila txikikoa –350 metroko igoera metatua–

Bidezidorreetatik egingo dugu ibilbide ia osoa eta bi aldapa ditu: Guadalupe inguruan aldapa gogorrena eta Jaizkibel tontorrerako igoeraren hasieran.

Aparkalekutik abiatuko gara. Gaur egun, begiratoki bat dago, eta bertatik Pirinioen hasiera ikus daiteke, Larrun eta Aiako Harria nabarmentzen direlarik. Ezkerrerantz abiatzen den bidezidorra hartuko dugu, lehen dorrerantz abiatzen dena.

Dorrea atzean utzi ondoren, hesi bat gurutzatuko dugu. Ibilbidean zehar, hainbat monumentu megalitiko daude, baina zorroztu begiak adi ez bagaude ikusi ere egin gabe pasako gara eta aldamenetik.

Ia bi kilometro egin ondoren lehen desbideraketa dator. Ezkerrerantz jaisten den bidezidorra hartu behar da, itsasorantz. Beheranzko malda handia amaitzen denean, erreka txiki bat gurutzatuko dugu eta ondoren, bidea basoarekin muga egiten duen hesi batera inguratuko da. Berehala, ate bat pasako dugu eskuinera biratzeko. Hareazko bide berri honek Guadalupeko ermitaraino darama, baina ez da hori gure helburua gaur.

Berehala, bidegurutze batera iritsiko gara eta gora doan pista hartuko dugu. –ezkerrekoa Guadalupeko ermitara jaisten da–. Eta hemen etorriko da ibilbidearen lehen aldapa gogorra.

Igoeraren amaieran hesi bat gurutzatuko dugu eta joanekoan egindako bidea egingo dugu berriz ere abiapuntura iristeko. Hortik Jaizkibelgo tontorrera igoko gara.

Orduan helduko diogu ibilbideko bigarren aldapari. Arrokak gurutzatu ondoren, etxola bat utziko dugu ezkerrean eta berehala leunduko da bidezidorra. Azken tarte horretan tontorreko antenak egongo dira erreferentzia gisa ikuspen ona badago.