Ikas-Bi, Seaska, Biga Bai, Euskal Haziak, Euskara Geroan eta Erakasleak elkarteek deituta elkarretaratzea egin dute hainbat hautetsik Hiriburuko Baste Quieta eskola publikoaren atarian, gaur.

Euskarazko murgiltze esperimentazioa onartzea nahi dute, eta euskara hutsean hastekoa zuten gaur 2020-2021 ikasturtea Hiriburuko Baste Quieta ikastetxeko ama eskolan. Bordeleko errektoretzak, ordea, uztailean eman zuen bere kontrakotasunaren berri. Derrigorrezko irakaskuntzak frantsesez behar duela azpimarratu zuen.

Hori dela eta, Parisen izan zen, atzo, Euskal Elkargoko ordezkaritza bat. Tartean zen Jean Rene Etxegarai presidentea. Frantziako Hezkuntza ministerioko ordezkari batekin elkartu ziren, baina ez zuten onarpenik jaso.

Gaurko elkarretaratzean adierazitakoen artean ipar euskal herritarren nahia azpimarratu dute. Esan dute talka handia dagoela Parisko jakobinismoaren eta euskaldun osoak formatzeko gero eta indartsuagoa den ipar euskal herritarren nahiaren artean. Eskubide linguistikoen alde lanean jarraitzeko asmoa berretsi dute askotariko alderdi politikoetako hautetsiek.