Emozioen kudeaketan ezohiko ikasturte hasiera da honakoa. Hala iruditzen zaio Sara Ines Vitoria psikologoari. Alde batetik uste du garrantzitsua dela itzultzea harremanetarako, aurrez aurreko komunikaziorako, umeak oso bakarrik egon direlako. Bestetik iruditzen zaio terrorifikoa ere badela itzulera hau. “Talde txikiak aipatzen dituzte, baina berez ratioak mantendu egiten dira. Ez dituzte ipini irakasle gehiago eta espazio nahikorik ez dago beti. Irakasleek erronka benetan latza dute”.

Online esperientzia posible izan dela azaltzen du psikologoak, baina adin batetik aurrera izan dela hori haur txikiak oso bakarrik egon direlako.

“Eskolara itzultzeak, urtero, hainbat emozio sortzen ditu neska-mutikoen artean, tartean beldurra. Gertatzen da ez dakidala eskolaratze hau zenbateraino den beldurgarria umeentzat. Nik ez ditut, orokorrean, beldurtuta ikusten. Uste dut ilusioa ere egon daitekeela. Lagunak topatu, lagun berriak egin, gauzak egin… Eta uste dut umeen bizipenetan badagoela helduen begiradatik ere. Helduak egoten bagara haserre, protestaka, erresistente… umeek entzun egiten dute hori, eta izan daiteke etxean edo kalean sumatzen edo gorpuzten dutena adieraztea. Uste dut umeek hartu dezaketela guzti hau modu naturalagoan. Denak ez, noski. Ez da orokortu behar, baina nagusiek erantzukizun handia dugu horretan”.

Nagusiek emandako azalpenak modu egokian, maitakorrean eta aproposean egiten badira umeak oso malguak direla dio adituak. “Egia da ume txikientzako zailagoa izango dela. Abere sozialak gara eta gure emozioak erregulatzen dira aurpegira begira. Aldiz, aurpegia estalita badaukagu ez dakigu ondo irakurtzen eta ume txikiek ez dute nahikoa ikasi. Besteak zelakoak diren, ze aurpegik zer san nahi duen, zelan sozializatu… Adin batetik aurrera hobeto badakizkigu gauza horiek”.

Psikologoak uste du ume bati ahalik eta mundu seguruena eta egonkorrena eskaini behar zaiola. “Eta helduek erantzukizun handia dugu etxean, aisian… zelan eta zer berba egiten dugun”.

Eman daitezkeen egoera askoren inguruan egin du berba Sara Ines Vitoriak Goiena telebistan egindako elkarrizketan. Ikasgela batean konfinamendua ezartzen denean, nerabeekin zer, irakasleek beldurrak… “Zelan jokatzen dugun, umearen aurrean zer eta nola esaten dugun…; izan ere, alterazio batzuk sortuko dira, eta umeek ere sumatzen dute beraien inguruan sortzen den nahasmena”.