Berrasmatu beharra ekarri du pandemia baten erdian hasi den ikasturte honek. Bizikidetza talde egonkorretan oinarritzen dira ikastetxeetako kontingentzia planak, eta berriz pentsatu behar izan dira jolastoki orduak, jangela zerbitzua…

Halaber, ze dinamika jarri dituzte martxan jarduera fisikoko eskolaz kanpoko saioetan? Eskola Kirola programako saioetan? Talde txikietan edota bakarka egingo diren jarduerak izango dira?

Adituek estrategia berriak sortu bitartean badira neska-mutikoei aisialdi hezitzailea eta naturarekiko jasangarria eskaintzea animatzen direnak, talde txikietan eta babes neurriak errespetatuz.

Aste bukaeran egin dute ahalegin berezia Ibai Arte merkatarien elkarteak eta Txatxilipurdi elkarteak, Arrasaten. Material naturalekin eta berrerabilitakoekin ibili dira jolasean Biteri plazan, gaztetxoenak.

Egurra, harriak, berrerabilitako materiala… Horiek guztiak eta gehiago izan dituzte jostailu. Ibai Artek antolatutako Merkataritza Berdearen astearen barruko ekimena izan da, eta Txatxilipurdi arduratu da jolasak prestatu eta dinamizatzeaz.

Esan moduan egungo egoerara moldatutako ekitaldia izan da: edukiera mugatua, guneak adinaren edo jolas motaren arabera hesituta, garbitasunerako materialarekin…