Ilustrazio asko egin ditu Rebeka Elizegi lasartearrak beste batzuek idatzitako ipuinentzako. Ordezko lore bat amarentzat, ordea, berak idatzi du. Bularreko minbizia atzeman zioten bere amari, eta orduan ikasitakoekin osatu du liburua egoera berean egon daitezkeen neska-mutikoentzako lagungarri izateko. “Gaixotasuna maitasuna bor-bor botatzeko unea da”, azaldu du.

Istorioak horixe kontatzen du. Mutiko bat da protagonista. Amari bularreko minbizia atzematen diote. Gai gogorra da, baina naturaltasun eta baikortasun handiz kontatutako ipuina eraiki du Elizegik. Marrazkiek, zalantzarik gabe, asko laguntzen dute gaia desdramatizatzen.

Tonu positiboan eta alaian idatzitako ipuina da. Umeentzako idatzia da, baina helduentzako ere oso lagungarria izan daitekeena. Gaiari buruz hitz egiteko aukera ireki dezake familia askotan, eta txikienek bizi dituzten emozioei irteera emateko aukera ere bai.

Ez da ipuin berria. 2011an idatzitakoa da.