Egunotako albistea da hiru gizon atxilotu dituztela adin txikikoen pornografia zabaltzeagatik. Atxiloketak Coruñan, Malagan eta Madrilen izan dira. Biktimak, berriz, 12 eta 15 urte bitarteko lau neska dira, gipuzkoarrak eta arabarrak. Ikerketak zabalik jarraitzen du; izan ere, ez da baztertzen biktima gehiago ere izatea.

Poliziak emandako informazioaren arabera adingabeko lau neska pornografia edukiak grabatzera behartzeagatik atxilotu dituzte hiru gizonezkoak, eta eduki horiek Internet bidez zabaltzeagatik. Ikerketaren arabera dirua, markako arropak eta sare sozialetan jarraitzaile gehiago lortzea eskaintzen zieten biktimei. Eduki pornografikoko zuzeneko konexioak egitea ere eskatzen zieten.

Uste duguna baino gertuago dago

Halako gertaerek erakusten dute halako egoerak uste duguna baino gertuago daudela; izan ere, adingabeak sare sozialetan daude eta etengabe jasotzen dituzte gonbidapenak. “Egia da normalean ez dituztela onartzen eta onartzen badituzte eta saiatzen badira datu pertsonalak lortzen ez dutela erantzuten. Baina ez erantzutetik erantzutera pauso txikia dago”, azaltzen zuen gertaera hauek ezagutzera eman aurretik gurasoei begira egindako formakuntza batean IKT ON zerbitzuko Rakel Gamitok.

“Arriskuaz jabetu eta seme-alabekin gaia lantzearen garrantzia azpimarratu zuen Gamitok. Teknologia berrien eta sare sozialen erabileraren inguruan hitz egin behar da seme-alabekin. Segurtasunari buruz ere bai, eta hori txiki txikitatik (…) Filtroak, kontrol parentala… asko daude eta etengabe ari dira garatzen. Lagungarriak dira, baina ez dute miraririk egiten. Onena eta betirako dena da gertu egotea, ahal den neurrian informazioa eskaintzea eta konfiantzazko harremanak eraikitzea zerbait gertatuz gero umea guregana etortzeko jakinik prest egongo garela laguntzeko”, gaineratu zuen.

Argazkiaren iturria: Rami-Al-Zayat.