KUKU! emozio bilduma berria kaleratu du Ikaselkar hezkuntza argitaletxeak. Sustatzaileek kontatu dute Haur Hezkuntzan oinarrizko emozioak lantzeko, nork bereak ezagutzeko, kudeatzeko eta besteenak hobeto ulertzeko hezkuntza-programa dela, eta ahozkotasunean oinarritzen dela.

Zer da KUKU! zehazki?

Bi urtetik aurrerako haurrekin oinarrizko sei emozio lantzeko material sorta da. Poza, beldurra, haserrea, tristura, nazka eta sorpresa dira, hain zuzen ere, landuko diren emozioak. Programa hau aplikatzeak pertsonen garapen osoa errazten du, hori baita hezkuntzaren helburu nagusia: hezkuntza integrala. Hala, horregatik, emozionalki ere adimentsuak izateko testuinguru aberats eta aproposak eskaintzen ditu. Eskolan zein familian, erabilgarriak diren elementuak plazaratu dira. 

Zein beharrek edo gogok bultzatuta egin duzue?

Funtsean, beharra eta helburua haurra hezkuntzaren protagonista nagusitzat daukan paradigma eskaintzea da.  Haurraren garapen integral horretan, oinarrizkoa da nork bere emozioak ezagutzea, kudeatzea eta gainontzekoenak ulertzea; hau da, emozionalki adimentsu izatea. Bide horretan, ikuspegi akademikoari eta etxean egin daitekeen bideari erreparatu nahi izan diogu.

Zenbaterainoko garrantzia du emozioak ipuinen bitartez lantzeak?

Album ilustratuak eta ipuinak haurraren behar esanguratsuak asetzeko tresna indartsua dira: emozionalki osasuntsu hazteko eta bizitzako gatazkei aurre egiteko indar terapeutikoa. Pentsamendua garatzearekin batera, kategoria intelektualak eraikitzen ditu haurrak, eta bidaia luze horren adierazle nagusia hizkuntza da. Album ilustratuek irakurtzeko bide desberdinak eskaintzen dizkigute, letrak edota irudiak irakurriz, baita elkarrizketa sustatuz ere. 

Emozio bakoitzeko album ilustratu bat proposatzen duzue…

Hori da, sei ipuin, sei istorio. Garrantzia eman nahi izan diogu, istorioari ez ezik, formatuari, diseinuari, eta ilustrazioari ere bai. Ipuinak emozio batera hurbiltzen ditu haurrak (ez emozio bakarra, izan ere, emozio bat baino gehiago egoten dira kateatuta), emozio batek dauka protagonismoa, eta emozio horren unibertsoa edo testuingurua ulertzen laguntzen duten istorioak dira, eta horretaz hausnartzeko eta lantzeko baliagarriak izatea bilatzen da.

Badago halako gaiak lantzeko materialik? Ohikoa da?

Pertsonaren garapenean emozioak identifikatzea eta kudeatzen ikasteak berebiziko garrantzia duenez, emozioen gaineko literatura eta baliabideak egon badaude. Ttartalo argitaletxeak Nire lehen emozioak deituriko saila argitaratzen du edota Emozioak hatz puntetan ipuin sentsoriala ere aurki genezake euren proposamenen artean. Pamielak eta Kalandrakak ere badituzte lan interesgarriak emozioak lantzeko, Anthony Brownen Nola sentitzen zara? esate baterako. 

Album ilustratuez gain, bestelako materiala ere barnebiltzen du zuen bildumak, ezta?

Bai, emozionalki adimentsu izaten laguntzeko bestelako baliabideak ere eskainiko dira. Horma-irudiak ditugu, esate baterako. Albumak bezala, horma-irudiak ere sei izango dira, emozio bakoitzeko bana. Behaketarako posterrak dira, ez apaingarri hutsak, emozioak lasai lantzeko… Bi alde dituzte, hau da, bi horma-irudi dauzkagu batean. 

Horrez gain, emozio txartelak ere baditugu. Jolaserako dira: emozioekin jolasteko, emozioez hitz egiteko, istorioak kontatzeko… nahi dena. Hemezortzi txartel ilustratu dira, bi aldeetatik. Alde batetik, oinarrizko sei emozio horien aurpegi-adierazpenak agertzen dira, emozio bakoitzeko hiru aldaera (intentsitate ezberdinetan adierazita). Eta beste aldetik, beste hainbeste egoera irudikatzen dira. Egoera irekiak, beti haurrak protagonista. Batzuetan garbiago ikus daiteke zer sentitzen duen haur horrek, zer emozio islatzen den… Beste batzuetan berriz, norberaren interpretazioaren araberakoa da.

Helduok ere makaleko erronkak ditugu ditugu alor horretan…

Kuku! bildumako elementuek erabiltzaile izango diren heldu horientzat aholkuak dituzte. Edozein kasutan, besteei emozionalki adimentsu izaten laguntzeko, lehenik, norberak jakin behar du bere emozioak identifikatzen eta erregulatzen. Emozioen ezagutzaren bidea, beraz, helduena ere bada.

Gainera, bildumako elementu hauek guztiek QR kode bat dute azalaren atzealdean. Horren bitartez gurasoek edota haurrarekin dagoen heldu horrek informazio osagarria eskuratuko du: emozioari buruzko argibideak, erabileraren inguruan jarraibide batzuk… Gonbidapena egin nahi diegu gurasoei bilduma ezagutu eta goza dezaten.

Etiketak: