Kriseilu eta guzti zeharkatu dute Olentzaroren basoa Amasa-Villabonako haurrek. Udalarekin elkarlanean, Zunbeltz elkartearen eskutik etorri da ekimena, oraingoan ere. 70 boluntarioren lanari esker egin dute. Ze ekimen polita!

Elosegi parkean kokatu dute, aurten ere, Olentzaroren basoa, eta kriseilu baten argipean garai bateko usadioak, sinismenak eta kontuak berreskuratzeko aukera eman du ekimenak.

Atzo, domeka, bederatzi emanaldi egin zituzten, 17:00etan hasita. 2012 eta 2018 urteen artean jaiotako haurrentzat antolatu dute ekimena, umeko heldu batek parte hartzeko aukera zuelarik.

50 laguneko taldeak osatu zituzten eta azpitaldeetan banatuta ordu laurdeneroko txandatan ekin zioten bideari parte-hartzaileek. Distantziak mantenduz eta musukoak jantzita egin dituzte aurten, bisitok.

Neguko solstizioko pertsonaia ugari

Etxeondotik abiatu eta Aranzabirainoko bidean barrena, Aranerrekatik gora egin zuten bidea parte hartzaileek. Neguko solstizioko pertsonaia ugari gertutik ezagutzeko aukera izan zuten, gainera: Antton eta Anttoni, galtzagorriak, sorginak, Olentzero eta Mari Domingi…

Informazio gehiago, argazkiak eta bideoa: Aiurri.eus atarian.

Argazkia: Aiurri.eus