Euskal Autonomia Erkidegoko (EAE) 500dik gora kirol elkartek egiten dute bat Bultza Kirola Euskadi plataforma ekimenarekin, eta jardueren etetea salatzeko adierazpen bateratua kaleratu dute.

Hala, elkarte horietako makina bat ordezkari elkartu ziren, atzo, Bilboko Arriaga plazan. Agerraldian eskola kirola egiteko adinean dauden neska-mutikoek bizi duten egoera salatu zuten.

Kezkatuta daude pandemia egoera dela-eta martxotik ezarri diren neurri murriztaileekin eta gogor salatu dute indarrean dagoen araudia. “Negatiboa” eta “alferrikakoa” dela uste dute, eta “oso mugatzailea” eskola kirola adineko neska-mutikoen kirol jarduerarekiko.

Kirola, funtsezko jarduera

Martxotik eskola kirola egiteko adinean dauden neska-mutikoak ez dute kirola erregulartasunez egiteko aukerarik, eta adin horretan jarduera fisikoa erregulartasunez egiteak duen garrantzia eta eragina azpimarratu dute. Gaineratu dute kirola funtsezko jarduera dela.

Salatzen dute Eusko Jaurlaritzaren aginduz daudela etenda martxotik eskola kiroleko jarduera guztiak. Aldiz, kirol jarduerak garatzeko aukera izan den esparruetan koronabirusa ez hedatzeko neurriak eta protolokoak ezarri direla, eta frogatuta gelditu dela ez dagoela ia kutsadura edo agerraldi arriskurik.

Osasungarriak diren ohiturak bultzatu behar direla uste dute eta haurtzaroan, zer esanik ez. Jarduera ezak ohitura sedentarioak dakartza eta horrek eragina du umeen osasunean.

Eusko Jaurlaritzari hainbat idatzi bidali izana adierazi dute eta jakin gura dute zergatik ez den eskola kirola onartzen. Neurriak berriz aztertuko dituztela esatea baino erantzun egokiagoa eskatzen diete agintariei.

Hala, eskola kirola funtsezko jardueratzat hartzeko eskatu diote Eusko Jaurlaritzari eta hezkuntza arautuan lehentasuna emateko.

Kirola osasuna dela azpimarratu dute eta frogatuta gelditu dela ikastetxeak ingurune seguruak direla halako kirol jarduerak burutzeko.

Argazkia: Arteaga FT