Pandemia egoerak aldaketa ugari ekarri ditu, eta etxe askotan ia hutsetik egoki behar izan dute hezkuntzan ezarri diren baliabide berrietara. Drive, Gmail, Calendar, Classroom eta halako aplikazioak egun batetik bestera sartu dira askoren egunerokoan.

Gaur egun, berriz, oso tresna erabilgarriak dira ikasle batek koarentena egin behar badu edo, besterik gabe, eskolan egindakoak etxean eskuragarri edukitzeko.

Gurasoendako formakuntza saioak eskaintzen dituzte, besteak beste, Macsonrisas taldeko kideek. Halako premiak egon badaude; izan ere, neska-mutikoei jarraipena egitea ez da beti erraza, eta tresna berriak erabili behar badira gutxiago. Julen Linazasoro da Macsonrisas taldeko ordezkarietako bat eta Elgetako udal liburutegian egin du azken formakuntza saioetako bat.

Drive, Gmail, Calendar, Classroom aplikazioen gaineko azalpenak eman zituen, gehienbat. “Gurasoek ez duzue zertan teknikoki kontrolatu tresna horiek guztiak. Zuen egitekoa da neska-mutikoen lana gainbegiratzea. Ze lan dute egiteko? Egin dituzte? Garaiz entregatzen dituzte? Halakoak begiratu behar dituzue zuek”, azaldu zuen.

Classroom aplikazioko Egitekoak atala nabarmendu zuen. “Hor ikusten dira zeintzuk diren egiteko dauden lanak, eginda daudenak edota entregatzeko daudenak”, esan zuen.

Karpetak eta dokumentuak sortzen, izendatzen, partekatzen edo antolatzen ere erakutsi zuen. Bestelako gogoetak ere egin zituen. “Zuen umeek argi izan behar dituzte hainbat gauza: ez da berdina aurrez aurre edo digitalki komunikatzea. Digitalean testuinguru falta da beti, eta horrek interpretazio arazoak ekar ditzake. Sare sozialen erabilerarako ere garrantzitsua da. Idatziz bidalitakoak betirako gelditzen dira. Ikus ditzake lagun batek, bikotekide batek, lan arduradun batek… Baita etorkizunean ere. Gauza garrantzitsuak aurrez aurre edo telefonoz esan behar dira. Horren jabe egin behar ditugu umeak”.