Azaroaren 9tik etenda dagoen Eskola Kirola programa baimendu du gaur Eusko Jaurlaritzaren LABI aholkularitza batzordeak. Asteazkenean abiarazteko aukera izango dute maila gorritik behera dauden herrietan. Hau da, intzidentzia tasa 100.000 biztanleko 500 positibotik beherakoa duten udalerrietan.

Bete beharreko baldintzak

Intzidentzia tasa izango da baldintzetako bat, eta horrekin batera entrenamenduak bakarrik izatea (lehiaketarik ez). Gehienez ere sei laguneko taldeetan egin beharko dira saioak, eta beti kide berdinak mantenduz. Gainera, ezingo da aldagelarik erabili.

Zapatuan mobilizatu ziren, beste behin, 500 kirol elkartetik gora elkartzen dituen Bultza Kirola plataformako kideak. Osasun sailburu Gotzone Sagarduik adierazi du gaurko agerraldian eskola kirola baimentzeko erabakiak ez duela zerikusirik mobilizazio horiekin.

Bada, asteotan, eskola kirola berriz abiaraztearekin erreserbak izan dituzten kolektiboak, tartean Bilboko Medikuntza Zientzien elkarteko kideak.

Eztabaidak eztabaida asko dira aste honetatik aurrera eskola kiroleko jarduerak berriz hasteko aukera izango duten 6-11 urte bitarteko neska-mutikoak.

Argazkia: Fadhil N