Porno vs. Afrodita edo I love #gorkaurbizu du izena antzezlanak eta Benetan Be taldearen umorezko proposamena da. 13 urtetik gorakoentzako gomendatzen dute. “Belaunaldiarteko samarra da; argazki orokorra ematen da, eta ikusle bakoitzak beretik ikusten du”..

Hausnartzeko komedia

Heziketa afektiboaren eta sexualaren inguruan Nafarroako ikastetxeetan abiatu zuten Skolae programaren bueltan sortu zen zalaparta dela-eta hasi ziren antzezlana sortzen. “Irakurtzen eta gaia aztertzen hasi ginenean, asko harritu ginen gazteek duten pornoa kontsumitzeko ohitura handiagatik. Egia da, baina, pornoa ez dela gazteetara bakarrik mugatzen. Fikzio hori errealitatetzat jotzen denean sekulako desfasea sortzen dela ikusi genuen, eta, horrek erakarrita, artearen bitartez hausnartzeko tresna izan nahi duen lana sortzen hasi ginen”, azaltzen du taldeko kide Patricia Urrutiak. “Hainbat pertsonaiaren artean, bi jainko agertuko dira: Porno eta Afrodita, eta horien bitartez egiten dugu sexuari buruz berba; oso lagungarriak egin zaizkigu bi pertsonaia horiek naturalki berba egiteko. Ero samarra dirudien taularen gainean nahiko txukun eta goxo pasatzen dira gauzak”.

Lanaren izenak argi adierazten du Benetan Be taldearen barre eragiteko asmoa: “Izenburuko bigarren zatiko traol txiki horrek harremana dauka antzezlanean jorratzen dugun beste kontu batekin; hau da, identitate likidoarekin eta sare sozialek sortarazten duten sasi-gertutasun sentsazioarekin; eta lotuta dago, era berean, lilurarekin edo eguneroko ametsekin. Guk lilura hori gurera ekarri nahi izan dugu, gure gertuko erreferentzia bilatuta. Gorka Urbizu aproposa iruditu zitzaigun, eta, gure ideia kontatu genionean, barrezka hasi zen, gustatu egin zitzaion”.

Zuzeneko musikarekin

Taularen gainean hiru pertsona daude Patricia Urrutia, Ion Zumelaga eta Juanjo Otero. Hiruren artean hamar pertsonaia antzezten dituzte. Hain zuzen ere, antzezlanaren abiapuntua da 40 urtetik gorako musikariek osatzen duten rock taldea azken kontzertua ematera doala. Zuzeneko musika egiten dute, tartean beraiek sortutako kantuak daudelarik