Sarri izaten dugu eguraldi euritsua gurean, zirimiria dela, euri langarra, zaparradak… euria Euskal Herriko eguraldiaren ohiko ezaugarria dela esan dezakegu. Hala ere, euriak maiz bisitatzen gaituen arren, egun euritsuetan kostatu egiten zaigu kalera irten eta jolastea. Euriak, hotzak, gaixotzeari beldurra izateak … eragin zuzena izaten du honetan.

Gurea baino iparralderago dauden herrietan aldiz, euria zein lainoa egon, egun hotz zein epeletan kaleak hartu eta parke, naturgune zein kaleetan jolastea oso ohikoa da. Beraz, beste toki batzuetan posible bada, gurean ere posible egin dezakegu, ezta? Eguraldiak eskatzen duenaren arabera egoki jantzita joatea eta gaixotzeari beldurra kentzea izan daiteke gakoa. 

“Euria hari du? Bai, putzuetan salto egin dezakegu, lokatzarekin margotu, euri urarekin aurpegia busti …!”

Eguraldi euritsuarekin ere kalera irtetean, haurrek bizitzako aldaketei moldatzen ikasten dute, egoeraren aldaketaren alde positiboa ikusiz besteak – beste, kasu honetan eguraldi aldaketaren alde positiboa.

Jarraian, euria edo hotza egiten duenean kalera irteteak haurrengan eragin ditzakeen onura batzuk zerrendatu ditugu:

  • Haurrei auto-erregulatzeko aukera ematen die.
  • Haurrak moldagarriagoak eta erresilienteagoak bilakatzen dira.
  • Sormena sustatzen du.
  • Urtaro aldaketak hobeto hautematen laguntzen die.
  • Haurraren sistema immunologikoa indartu egiten da eta birusetatik babesten laguntzen die.
  • Haurrek jarduera fisikoa egitea sustatzen du.

Andrew Mc Martin-ek dioen gisara, “ipar poloan bizi zein desertuan edo tropikoan bizi, haurrak osasuntsu hazten dira munduan zehar”. Beraz, bizi garen lekuko giroa aprobetxatzea dagokigu. Eguraldia aztertu, egoera baloratu eta modu egokian jantzi besterik ez dugu egin behar.